ABŞ Prezidenti Donald Trampın və Ağ Evin rəsmi sosial şəbəkə hesablarında süni intellektlə hazırlanmış foto və videoların tez-tez paylaşılması internet istifadəçilərinin və pop-mədəniyyət həvəskarlarının kəskin etirazına səbəb olub.

Kulis.az xəbər verir ki, Trampın "memetik müharibə" taktikası çərçivəsində özünü Supermen, Ceday və ya Spaydermen obrazlarında təqdim etməsi, populyar personajların əsas prinsiplərini anlamamasının göstəricisi kimi qiymətləndirilir.

Son olaraq onun Yaşıl fənər (Green Lantern) rolunda təsvir edildiyi video kəskin tənqid hədəfinə çevrilib.

Süni intellektlə hazırlanmış videoda Tramp "Yaşıl Fənər" üzüyünün gücü ilə sərhəd divarı hörür və üzərindən hərbi təyyarələr uçur; lakin komiks həvəskarları "Yaşıl Fənər" ordusunun kainatda sərhədsiz sülhü qoruduğunu, bu səbəblə personajın miqrasiya əleyhinə istifadəsinin məntiqsiz olduğunu bildirirlər.

Analitiklər və sosial şəbəkə istifadəçiləri Trampın bundan əvvəl özünü miqrant olan Supermen və ya qırmızı işıq qılınclı Ceday kimi təsvir etməsini də eyni mədəni cəhalət silsiləsinin tərkib hissəsi hesab edirlər.

Sosial media istifadəçiləri ölkənin üzləşdiyi ciddi iqtisadi və xarici siyasət böhranları fonunda prezidentin Ayı ABŞ ərazisi elan etməsi və bu kimi süni intellekt kontentləri paylaşmasını "diqqəti yayındırmaq cəhdi" kimi dəyərləndirirlər.

Mütəxəssislər vurğulayır ki, süni intellekt vasitəsilə uydurma güc nümayiş etdirmək real siyasi nüfuzu deyil, əksinə, xəyali hakimiyyət iluziyasını göstərir və reputasiyaya zərbə vurur.

• Britaniya Naqa əcdadlarının qalıqlarını yerli icmaya qaytaracaq
• Məhkumlar teatr səhnəsinə çıxdılar – Həbsxananın həyətində
• Tim Kerrinin ölüm səbəbi açıqlandı