Cəfər Cabbarlı adına “Azərbaycanfilm” kinostudiyasının 1 noyabr 2022-ci il tarixində start verdiyi “START-2023” adlı film layihəsi müsabiqəsinin qalibləri açıqlanıb.

Kulis.az xəbər verir ki, Kinostudiyadan APA-ya verilən məlumata görə, Ekspert Şurasının sonuncu iclasında qaliblər müəyyənləşdirilib. Nəticələrə əsasən, “Tammetrajlı bədii film layihəsi” kateqoriyasında “Özgə ağrı” (Rövşən İsgəndərov), “Qısametrajlı bədii film layihəsi” kateqoriyasında “Erkən hisslər” (Nurlan Həsənli) və “Neytral zonanın sonuncu sakini” (Tahir Tahiroviç), “Qısametrajlı animasiya filmi layihəsi” kateqoriyasında “Balıq” (Fuad Quliyev) və “Sonuncu lələk” (Firəngiz Bağırova) layihələri qalib elan olunub.

Ekspert Şurasına kinorejissor, Əməkdar incəsənət xadimi Elxan Cəfərov sədrlik edir. Şuranın üzvləri filologiya üzrə fəlsəfə doktoru, dosent, ssenari üzrə dərsliklərin müəllifi Gülşən Qafarova, rejissor, prodüser Əli İsa Cabbarov, aktyor, ssenarist, Xalq artisti Vidadi Həsənov, rejissor, prodüser, ssenarist İlham Qasımov, məsul katib isə Leyla Vəzirzadədir.

Qeyd edək ki, 31 yanvar 2023-cü il tarixində layihəyə sənəd qəbulu başa çatıb və ümumilikdə 45 layihə dəyərləndirilmək üçün “Azərbaycanfilm” kinostudiyası nəzdində yaradılmış Ekspert Şurasının ixtiyarına verilib.

Müsabiqə müraciət olunan kateqoriyada debüt (birinci və ya ikinci) filmini çəkmək istəyən rejissorlar üçün nəzərdə tutulub.

Yaxın günlərdə Ekspert Şurasının üzvlərinin də iştirakı ilə mətbuat konfransının keçirilməsi və qaliblərə diplomların təqdim olunması planlaşdırılır. Növbəti mərhələdə qalib olunan layihələrin istehsal olunması nəzərdə tutulub.

• Bağdadda qədim dövrə aid çörək və pivə istehsalı sahələri aşkarlandı
• Zadi Smit, Marqaret Etvud və İan Maküen oxuculara qeyri-adi təklif
• Nobel mükafatçısı ilə qalmaqallı evlilik yaşayan isveçli yazıçı - Moa Martinson kim idi?