Bu gün görkəmli rus aktyor Yuri Nikulinin doğum günüdür.

Kulis.az Çingizin "Sovet kinosunun simaları: Yuri Nikulin" yazısını təqdim edir.

Görkəmli rus aktyoru, məşhur sirk artisti Yuri Vladimiroviç Nikulin 1921-ci ildə Smolensk quberniyasının Demidov şəhərində anadan olub. Atası Vladimir Demidovdakı dram teatrında mədəni-maarif işçisi, anası isə həmin teatrda aktrisa kimi çalışırdı. 1935-ci ildə Nikulinin ailəsi Moskvaya köçür və o, orta məktəbi burada bitirir. 1939-cu ildə o, orduya çağırılır və zenit artilleriyasında xidmət edir, sonra Böyük Vətən müharibəsinin (1941-1945) iştirakçısı olur. “İgidliyə görə”, “Leninqradın müdafiəsinə görə”, “Almaniya üzərində qələbəyə görə” medalları ilə təlif edilir.

1946-cı ildə serjant Yuri Nikulin ordudan tərxis olunur. O, Moskva sirkində klounada studiyasına daxil olur. Studiyanı bitirdikdən sonra o zamanın məşhur klounu Karandaşın yanında köməkçi işləyir. Bir qədər sonra digər bir sirk klounu Mixail Şuydinlə duetdə çıxış etməyə başlayır. Bu duet uzun illər, Mixail Şuydinin 1983-cü ildə vəfat etməsinədək fəaliyyət göstərir. Bundan sonra Nikulin sirkin direktoru vəzifəsində çalışır. O, bütövlükdə ömrünün 50 ilini sirkdə işləyib və minlərlə tamaşaçının sevimlisinə çevrilib.

Lakin Nikulini daha çox məşhurlaşdıran kinoda oynadığı rollar olur. O, kinoda ilk rolunu 1958-ci ildə “Gitara çalan qız” filmində oynayır. Burada məşhur aktrisa Lyudmila Qurçenko ilə tərəf-müqabil olur. Karyerası boyu Yuri Nikulin saysız -hesabsız rollar oynayıb, bir çox sevilən rus filmlərində maraqlı obrazlar yaradıb.

Ona ən böyük şöhrəti isə rejissor Leonid Qaydayın çəkdiyi komediya filmlərində yaratdığı obrazlar gətirir. “Araq çəkənlər”, “Köpək Barbos və qeyri-adi kross”, “I” əməliyyatı və Şurikin başqa macəraları”, “Qafqaz əsiri və ya Şurikin yeni macəraları” filmlərində Nikulinin digər iki məşhur aktyor - Yevgeni Morqunov və Georgi Vitsinlə birgə yaratdığı komik üçlük (Qorxaq, Bivec və Çoxbilmiş) milyonlarla tamaşaçıya yaxşı tanışdır.

Nikulinin “Brilyant əl” komediyasında oynadığı Semyon Semyonoviç Qorbunkov obrazı da sovet kinosunun ən yaddaqalan surətlərindəndir. Yeri gəlmişkən, bu filmin bir hissəsi Bakıda, İçərişəhərdə çəkilib.

Nikulin “Qoca quldurlar”, “Müqəvva”, “Ağaclar böyük olanda”, “Müharibəsiz iyirmi gün” və s. filmlərdə də maraqlı obrazlar yaradıb.

Yuri Vladimiroviç Nikulin kinoda və sirk sənətində fəaliyyətinə, qazandığı uğurlara görə SSRİ Xalq artisti adına layiq görülmüşdü. Görkəmli sənətkar 1997-ci il avqustun 21-də vəfat edib.

• Uçuş - Sülhiyyə Şirinovanın hekayəsi
• İrəvan Teatrında “Stalin – İzm” tamaşasının məşqləri davam edir
• Jak Lakan: "Sevgi - olmayan bir şeyi olmayan birinə verməkdir..."