4 gündür, internetsizəm. İnternetin pulunu ödədiyim halda, durduq yerdə kəsildi. Ora zəng, bura zəng, axırda belə cavab aldım ki, məndə olan provayder Xətai rayonundan çıxıb. Deyirəm, çıxıbsa, adam əvvəlcədən müştərisinə xəbər eləməz? Üstəlik, 3 gün qabaq ödəniş də etmişəm. Cavab ala bilmədim.

Xülasə. Başqa bir provayder tapdım. Ünvanı izah elədim. Cümə günü zəng gəlib ki, müəllim, sizin ev NZS-in harasındadır? Deyirəm, nə NZS? Mən NZS-də yaşamıram axı. Deyir, necə yəni orada yaşamırsınız? Bizə elə dedilər axı. Zəng vurmuşam operatora ki, NZS nədir? Siyahıya baxıb cavab verir ki, Yusif Səfərov 36 c demisiniz. Deyirəm, hə. Deyir, ora hara yaxındır? Deyirəm, Ali Məhkəməyə, Neftçilər Xəstəxanasına, Leyla Şıxlınskayaya. Deyir, hə, siz Ali Məhkəməmin yanındakı NZS-də yaşayırsınız? Deyirəm, ay xanım, mənimlə məzələnirsiniz? Burada NZS var? Deyir, üzrlü sayın, onda bu günü qalsın, sabah əməkdaşlarımız gələr.

Dünən günortaya yaxın zəng gəlib, açmışam. Deyir, qardaşım, internetə görə zəng vurmuşam. Dedim, buyur. Dedi, biz gəlmişik NZS-ə, sadəcə bir şey soruşum, sizin ev tərəfdə bizim provayderin qutusu var? Dedim, mən NZS-də yaşamıram, Allah haqqı. Sizi ora yönləndirəni NZS-də basdırsınlar. Mən Xətaidə yaşayıram, sizin qutu da burada var. Oğlan qayıtdı ki, onda "konum" atın, gələk. Atdım. Operatora zəng eləmişəm ki, bəs axı dünən izah etdim ki, mən NZS-də yox, Xətaidə yaşayıram. Qız qayıdasan ki, bəli, müəllim, Ali Məhkəmə tərəfdəki NZS, hə? Səbrimi basıb təzədən izah edirəm ki, Ali Məhkəmə tərəfdəki NZS deyə bir anlayış yoxdur. Siz ev sahibinin də sizə verdiyi ünvana baxın, bəlkə, o nəyisə qarışdırıb. Qız baxdı, cavab verdi ki, müəllim ünvan olaraq, Yusif Səfərov 36 c yazdırıb. Dedim, əla. Bəs mən nə yazdırmışam? Dedi ki, Yusif Səfərov 36 c. Dedim, əla. Bəs bu NZS söhbəti haradan çıxıb? Dinmədi. Azca gözləyib üzr istədi və dedi ki, bu gün çatdıra bilməyəcəklər, sabab yaxınlaşıb interneti çəkəcəklər.

İndicə yenə zəng gəlib. Açmışam. Allaha and olsun, salamlaşandan sonra ilk cümlə bu oldu: qardaş, siz bu NZS-in hansı tərəfində qalırsınız?

• “Mədəni Azərbaycan” jurnalının xüsusi buraxılışı Füzuliyə həsr olundu
• “Tariximizin işığında - Qərbi Azərbaycanın izi ilə” layihəsi başladı
• Bu da bayram süfrəsi; yarım araq, şor balıq... - Günün şeiri