"Bu müraciətim 70-ci illərdən sonrakı yaradıcı nəsilə ünvanlanıb. Naşir kimi yeni yaradıcı mühitin formalaşmasında hansı rolu oynaya bilərəm, yaradıcı gəncliyə necə dəstək ola bilərəm? Bu suala cavab tapmaq üçün sizlərlə görüşmək istəyirəm. Uzaqda qalmaqla bir-birimizə dəstək ola bilmərik. Gücümüzü bir edək. Yazaq, nəşr edək, təbliğ edək, daha geniş çevrələrə xitab edək" - bu sözləri "Qanun Nəşrlər" evinin direktoru Şahbaz Xuduoğlu öz sosial media hesabından yaradacı insanlara müraciətlə deyib.

Kulis.az həmin müraciəti təqdim edir.

"Əziz yaradıcı dostlar

Bu həftənin şənbə günü yaradıcı insanlarla görüşmək istəyirəm. Məqsəd, nəşriyyat kimi öz imkanlarımızla tanış etmək, eləcə də onları dinləmək, fikir mübadiləsi aparmaq, yeni yaradıcı gəncliyə yardım etməkdir.

“Sevdiyim 50 hekayə” layihəsi ilə bağlı yerli yazarlarımızın əsərlərini oxuyuram. Xeyli yeni imza ilə tanış oldum.

70-ci illər nəsli pis-yaxşı üzə çıxa biliblər. Yəni, kitabları nəşr olunub, mətbuatda daim çıxış edirlər, yaradıcı təsir gücü yaradıblar, müəyyən bir mühit də formalaşdıra biliblər. Cəmiyyət artıq onları tanıyır. 80-ci il və sonrakı nəsillər daha pərakəndə görünür; kitabları azdır, 70-lərə nisbətən daha passivdirlər.

Amma “Sevdiyim 50 hekayə”də üzə çıxa bilən, iddia qoyan az imza rastıma çıxdı.

İllər öncə kitab bloggerlərini görüşə dəvət etdim, hələ də o xoş təəssürat yaddaşımdadır. Kitab mühitində hadisə oldu. İnanıram, yaradıcı ortamın bir araya gəlməsinin kitab işinə, sizin yaradıcılığınıza çox böyük töhfəsi olacaqdır.

Bir kitabın ərsəyə gəlməsi üçün əsas onu yazandır, sonra onu tərtib edən, daha sonra isə növbə naşir və kitabçılara gəlir.

Nəzərdə tutduğum görüşdə şair, yazıçı, tərcüməçi, rəssam və mətn üzərində çalışan bütün heyəti görmək istəyirəm.

Naşir kimi yeni yaradıcı mühitin formalaşmasında hansı rolu oynaya bilərəm, yaradıcı gəncliyə necə dəstək ola bilərəm? Bu suala cavab tapmaq üçün sizlərlə görüşmək istəyirəm.

Bu həftənin şənbə günü vaxt ayırın, nəşriyyata gəlin. Həm bizim imkanlarla tanış olun, həm də fikir mübadiləsi aparaq. Qarşılıqlı imkanlarımızı dəyərləndirək. Gözləntilərinizi dilə gətirin.

Uzaqda qalmaqla bir-birimizə dəstək ola bilmərik. Gücümüzü bir edək. Yazaq, nəşr edək, təbliğ edək, daha geniş çevrələrə xitab edək.

Yaradıcı əməkdaşlıq üçün o an gəlib.

Şənbə günü, fevralın 12-də, saat 14:00".

• "Sosial hesablama" niyə "Sosial şəbəkə"nin kölgəsində qaldı?
• Tom Kruz və İnyarritunun "Digger" filmi kino tarixinin ən böyük maliyyə iflaslarından birinə çevrilir
• Acın ova, toxun Allaha getdiyi yer... - Qobustanla Göbəklitəpəni hansı sirr birləşdirir?