Azərbaycan Respublikasının mədəniyyət naziri Adil Kərimlinin göstərişi, Şirvan-Salyan Regional Mədəniyyət İdarəsinin rəisi Şahin Şahbazovun əmri ilə Kürçaylı Zabil oğlu Məmmədov Salyan Dövlət Rəsm Qalereyasına direktor təyin edilib.

Kulis.az xəbər verir ki, Kürçaylı Məmmədov indiki vəzifəsinədək Salyan rayon Mədəniyyət Mərkəzinin bədii rəhbəri vəzifəsini daşıyırdı.

Qeyd edək ki, Kürçaylı Məmmədov Azərbaycan Dövlət Mədəniyyət və İncəsənət Universitetinin bakalavriat və magistratura pillələrini bitirib. O, təhsil aldığı illərdə Xalq artisti, kinorejissor Vaqif Mustafayev, Əməkdar incəsənət xadimi, kinorejissor, Azərbaycan Dövlət Film Fondunun direktoru Cəmil Quliyev, Xalq artisti, kino və teatr aktyoru Pərviz Məmmədrzayev, rejissor, aktyor Rövşən İsax, aktyor, bədii qiraətçi Nadir Hüseynov, Əməkdar mədəniyyət işçisi, televiziya film və tamaşaları rəssamı Rafael Əsədov və onlarla görkəmli sənət adamının tələbəsi olub, onlardan sənətin incəliklərini öyrənib.

Kürçaylı Məmmədov bir neçə qısametrajlı bədii və sənədli filmlər, etüdlər, televiziya verilişlərinin müəllifi və rejissorudur.

Onun rejissoru olduğu "Bərə" qısametrajlı filmi 10-cu Bakı Beynəlxalq Qısa Filmlər Festivalında "Münsiflər heyətinin diplomu"na, "Sabahın xeyir, Sübh anası" sənədli filmi isə 14-cü Bakı Beynəlxalq Qısa Filmlər Festivalında "Ən yaxşı sənədli film" nominasiyası üzrə qalib gələrək baş ödül - "Qızıl nar"a, layiq görülüb, həmçinin "Dağlardakı Qarxun" sənədli filmi isə Türkiyədə keçirilən 5-ci Türk Dünyası Belgesel Film Festivalın laureatı adını alıb.

Qeyd edək ki, Kürçaylı Məmmədov həm də Şirvan-Salyan Regional Mədəniyyət İdarəsinin kommunikasiya meneceridir.

• Birgə Bəyannamə: "Mədəni və etnik müxtəliflik: tarixin dərsləri, müasir çağırışlar"
• "Yenə əzəlkidir, baxışın, səsin..." - Anna Axmatovanın şeirləri
• İstəsəydim səni səndən alardım - Günün şeiri