“Nova Gorica” kino mərkəzində “Qıfıl” adlı tammetrajlı bədii filmin hazırlıqları başlayıb.

Kulis.az xəbər verir ki, komik melodram janrında olacaq filmin çəkilişlərinə iyul ayında başlanılması planlaşdırılır.

Filmin mövzusuna əsasən Zeli (Zeynalabdın) kəndlərindən bir qız sevir. Lakin qıza başqa biri elçi düşür. Zeli də falçıya müraciət edərək toyun baş tutmasına mane olmaq istəyir. Falçı ona bir qıfıl verir ki, sevdiyi qızın valideynlərinin ağzı bağlansın. Qıfılı hasardan həyətə atanda isə təsadüfən nənənin sinəsinə dəyir. Nənənin ölməsindən qorxan ailə toyu tezləşdirir. Arzusu ürəyində qalan Zeli bu hadisədən sonra kor-peşman Bakıya gedir. O, kəndə bir də xəzəl düşəndən sonra qayıdır. Bəlkə, qızı görər deyə, yolunu onların qapısının ağzından salır. Əlbəttə, Zeli artıq ər evində olan qızı görmür. Birdən gözlərindən iki damla yaş gilələnir və ürəyində falçı Aminəni söyür.

Filmin ssenari müəllifi və quruluşçu rejissoru Tahir Tahiroviç, quruluşçu operatoru Rafiq Əliyev, bəstəkarı Lalə Əhmədova, kreativ produseri İradə Bağırzadə, baş prodüseri Vidadi Rüstəmovdur.

Layihə Mədəniyyət nazirliyinin “Tammetrajlı bədii film layihələrinə dəstək-2022” müsabiqəsinin qalibləri sırasında olub və hazırda filmin kastinq prosesi gedir.

• Şakir Yaqubovun 75 illiyi qeyd olundu
• “Kompozisiyanın əsasları” adlı təlim proqramı elan edildi
• Qrafikaya romantik ruh bəxş edən rəssam - Cəmil Müfidzadə yaradıcılığının estetikası