Kulis.az Rəna Nevzatın yeni yazısını təqdim edir.

Bu səhərin xəbərlərindən: Qazi ağır qəza törətdi – bir ölü, beş yaralı.

Əlbəttə, tez-tez bu cür xəbərlərlə rastlaşırıq. Amma bu hadisədə başqa şey diqqəti çəkir. Avtomobili idarə edən qazinin sürücülük hüququ yox idi!

Uşaqlığım doxsanıncı illərdə keçib və Birinci Qarabağ müharibəsindən qayıdan xeyli qazi (o vaxt “veteran” deyirdilər) tanıyırdım. Heç biri döyüşdüyü üçün bizə minnət qoymurdu, heç “döyüşmüşəm”, “vuruşmuşam” sözlərini dilə də gətirmirdilər.

Yəqin, qalib gəlməməyin utancı, işğalın ağırlığı da rol oynayırdı bunda. Nə də olmasa, o vaxt məğlub idik.

2020-ci ilin 44 günü isə tariximizə qızıl hərflərlə yazıldı. Xalq olaraq bir olduq, ölkə olaraq azad olduq, bütünləşdik, qələbəmizə sevindik, şəhidlərimiz üçün ağladıq, döyüşdən salamat qayıdanlarımız üçün qurbanlar kəsdik.

Amma qazilər yaman “qazlı” qayıtdılar. Hamısına aid deyil əlbəttə ki, ancaq çoxuna aiddir.

“Qaziyəm!” sözü parola döndü, “əynimdəki formaya hörmət elə!” ifadəsi ittiham oldu.

Nə qədər adam qazilik imtiyazından sui-istifadə elədi. Feysbukda qızlara “padxod” etməkdən tutmuş, paltar alanda qiymət “öldürməyə” qədər.

Yadınıza salın, pandemiya qadağalarının tüğyan etdiyi vaxt nə qədər qazi maskasız gəzirdi, bir söz deyən olanda da, “qaqa, qaziyəm, hörmət elə” deyirdilər.

(Bəlkə də yersiz bənzətmə olacaq, amma qırmızı hərbi bileti Mayakovskinin “qırmızı sovet pasportu”na döndərmişdilər:

Alın ha,

Yana-yana qalın ha.

Mən Sovet vətəndaşıyam!..)

Hələ keçən dəfə nə eşidirəm. Dörd dost kafelərdən birində oturub yeyib-içib. Hesab vaxtı gələndə deyiblər ki, biz qaziyik, pul vermirik. Məsələyə polis qarışandan sonra məcbur hesabı ödəməli olublar.

Belə hadisələr n qədər olub bu dörd ilin içində.

İndi də bu qəzanı törədən qazi.

Sənə kim ixtiyar vermişdi sürücülük vəsiqən olmadan sükan arxasına keçirdin? Özün bir yana, başqalarının da həyatını təhlükəyə atırdın. Necə ki oldu. İndi sənin qaziliyin o vəfat etmiş qadını həyata qaytaracaq? Ya, yaralananları sağaldacaq?

Qanun hamı üçün birdir. Qazilər üçün də, hərbiyə yarasızlar üçün də, məmurlar üçün də.

Bir şeyi başa düşün, qazilik imtiyaz deyil. Vətən uğrunda döyüşmək bütün döyüşə yararlı vətəndaşların borcudur. Və bu, kimisə kimdənsə üstün eləmir.

• Ötən il kinoteatrlarda neçə yerli film nümayiş olunub?
• Çanaqqalada tarixi kəşf: 8731 məzar tapıldı
• Stalinin alnından öpdüyü azərbaycanlı aktrisa - Bir ildə həyat yoldaşını və qızını itirən Xalq artistinin faciəvi həyatı