Dekabrın 13-də Heydər Əliyev Sarayında mədəniyyət nazirinin birinci müavini Elnur Əliyev 20 illik yubileyi münasibətilə “Planet Parni iz Baku” KVN teatrının kollektivi ilə görüşüb.
Kulis.az xəbər verir ki, Elnur Əliyev Mədəniyyət nazirliyinin qarşısına qoyduğu missiya haqqında məlumat verib. “Gələcəkdə yalnız milli dəyərlərini saxlayan xalqlar irəli gedəcək, dünya ölkələri fonunda seçiləcək. Bu mənada nazirliyin qarşısında zəngin mədəni dəyərlərimizi qorumaq, təbliğ etmək kimi bir missiya dayanır”,- deyən Elnur Əliyev bu istiqamətdə Mədəniyyət Nazirliyi tərəfindən strategiya hazırladığını bildirib.
44 günlük Vətən müharibədə qazandığımız tarixi qələbədən söz açan E.Əliyev deyib ki, əldə etdiyimiz qələbə həm də mədəniyyətimizin qələbəsidir.
Bildirib ki, Mədəniyyət Nazirliyinin təşəbbüsü ilə yaxın zamanlarda Qarabağda əsgərlərin qarşısında qısa tamaşalar nümayiş olunacaq.
“Planet Parni iz Baku” KVN teatrının keçdiyi yola nəzər salan E.Əliyev bildirib ki, bu teatrın Moskvadakı çıxışları hər bir azərbaycanlının qəlbini fərəh hissi ilə doldurdu: “Səhnədə muğamın səslənməsi, mədəniyyətimizi yumor vasitəsilə əcnəbilərə çadırılması olduqca vacibdir. Ötən 20 illik zaman kəsiyində teatr bu işin öhdəsindən hər zaman çox böyük bacarıqla gəlib”.
Sonra Elnur Əliyev Mədəniyyət Nazirliyi adından “Planet Parni iz Baku” KVN teatrına fəxri fərman təqdim edib.
Teatrının bədii rəhbəri Tahir İmanov göstərilən diqqətə görə kollektiv adından təşəkkürünü bildirib: “Biz hər zaman Azərbaycan mədəniyyətini təbliğ etməyə çalışmışıq. Festivallardakı hər bir çıxışımızda başqa xalqlara məxsus olmayan milli adətlərimizi təbliğ edirik. İndi biz bu işi daha da yüksək səviyyədə aparmalıyıq”.
Sonda xatirə şəkili çəkdirilib./azertag.az/
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
