Kulis.az Nadir Yalçının "Mehdi Xocalıda doğuldu" yazısını təqdim edir.


09:43-də saytda bu başlıqla xəbər gördüm: “Azərbaycana dənizlə narkotik gətirən iranlı balıqçılar saxlanılıb”.

Nəsə adama qəribə gəlir. Dəniz, balıq, balıqçı... və narkotik. Uşaq vaxtından balıqçılıq maraqlı, ziyansız peşə kimi görünüb. Romanlarda, kinolarda təqdim olunan balıqçı obrazı da bu mübhəmliyə xidmət edib. Lakin görünür, axan su da həmişə təmizliyə, paklığa xidmət edə bilmir, əgər qoynunda nadürüst qayıqlar üzürsə...

Texnologiya qarşında eyni anda üç-dörd pəncərə açır deyə, bir şey haqqında ətraflı düşünməyə macal tapmırsan, nəzərini nəsnələr arasında mütənasib bölüşdürə bilmirsən. “Qəhrəman” balıqçılar xəbərinin ab-havasından ayılmamış, digər xəbərin ilk cümləsini oxudum: “İşğaldan azad edildikdən sonra Xocalı rayonunun Ballıca kəndində ilk körpə dünyaya gəlib”.

Uşağa babasının adını veriblər: Mehdi.

Mehdi Xocalıda doğuldu, əsl Mehdi.

90-ların ikinci yarısından üzü bu yana tez-tez belə xəbərlər oxuyuruq: “Filankəs özünü İmam Mehdi kimi qələm verdi”, “Özünü İmam Mehdi adlandıran filankəs...”

Nə qədər adam hansısa səbəblərdən övliyalıq eşqinə düşür. Zamanın sahibi olmağa iddialıq edir, müqəddəslik vəd edir. Bu xurafatçılar da çox keçməmiş cəzalandırılır.

Xristianlar İsanın, yəhudilər Meşiahın (məsih),buddistlər Maitreyanın intizarında olduğu kimi, İslamın bir qanadı da İmam Mehdinin qeyb olduğuna və bir gün zühur edəcəyinə inanırlar. İnanclar müxtəlifdi. Bəziləri bu məsələyə qətiyən inanmaya bilər. Hətta bu yazdıqlarıma görə məni qınayanlar da tapılacaq. Amma məsələ odur ki, adını nə qoyuruqsa, qoyaq, bu ümid, gözləmək, gəliş, təzələnmə, gözlənilməz dəyişiklik bir anlayışdı və müxtəlif dinlər, mifik hadisələr, inanclarla insanların psixologiyasında müxtəlif cür təzahür edib.

Azərbaycanlılar öz ümid işıqlarını belə parıldada bildilər: Xocalını (külli-Qarabağı) yadellilərdən azad etməklə.

Azərbaycanlılar öz mübarək və müqəddəslik kodlarını torpağa, insana köçürə bildilər. Bu simvolizm nə qədər qəribə görünsə də, bu cür reallaşdı: Xocalıda məhz fevral ayında bir körpə doğuldu. Həmin körpənin adını Mehdi qoydular. Mehdi adının mənası düz yolda olan deməkdir. Düz yolumuzun ilkin carçısı oldu Mehdi.

Bu fevral həmin fevraldır ki, 33 ilin həmin ayı xocalılar üçün zülüm-zillət ayı kimi ağrılarımızın təcəssümanına çevrildi. İndi Mehdinin Xocalıda doğulmağını ədalətin, işığın zühuru kimi qələmə vermək əbəs deyil. Mehdi qarşıdan gələn Baharın ilk pöhrələrindən də qabaq Xocalıda dünyaya gəldi. 33 il əvvəl Bahara çıxmayan, sazaqlı fevralda həyatla bütün əlaqələri kəsilən uşaqların xatirəsinə Tanrı da ehtiramla yanaşdı – balaca Mehdi sağ-salamat doğuldu.

Mehdinin atası da Vətən müharibəsi qazisidi. İlqar Məmmədov indi ANAMA-da işləyir. Bir müddət əvvəl ailəsi ilə birgə Ballıcaya köçüb. İlqar Məmmədov torpağı qarış-qarış partlayışlardan xilas edən – balaca müharibələrdən qoruyanlardan biri kimi daha emosional və kritik vəziyyətdədir. Biri var, harasa ezam olunasan, biri də var, yaşadığın yerdə, məskənləşdiyin əraziyə yaxın məsafədə, yeni doğulan körpənin həniri gələn səmtdə torpaq üçün çalışasan.

Mina təmizləmək də döyüşdü, mübarizədi, səngərdi...

...İndi qayıdaq səhər 09:43-də oxuduğum “Azərbaycana dənizlə narkotik gətirən iranlı balıqçılar saxlanılıb” xəbərinə... Biri deyir, İmam Mehdi Ərəbistanda zühur edəcək, o biri deyir, İranda, nə bilim, daha haralar... Bizim sularımızı bulandıran olmasa, elə öz Mehdimizi Xocalıda da dünyaya gətirə bilirik, gətirdik də...

• Tuve Yanssonun möcüzəli aləmi - Onu niyə "muminlərin anası" adlandırırdılar?
• Dünya ədəbiyyatının 10 qeyri-adi süjetli romanı
• “Star Wars” anime ilə ekranlara qayıdır