Kulis.az Ulucay Akifin yeni yazısını təqdim edir.

Deyirəm, yaxşı ki, bu sosial şəbəkələr var, yoxsa boş-bikar, heç bir işə lazım olmayan adamlar necə başını qatardı, necə fikir bildirərdi başqa məsələlərə aid?

Dünəndən hara baxıram, hamı Kamal Abdullanın müsahibəsində səsləndirdiyi fikirləri müzakirə edir.

Müsahibəni tapdım, baxdım. 18 dəqiqəlik müsahibədir. Məncə, bu fani dünyada hamının 18 dəqiqə vaxtı var tənqid etdiyi şeyi izləyib məsələdən tam agah olmaq üçün. Deməli, Kamal Abdulla müsahibədə belə deyir:

“Qadın evdə oturub övladlarına, ailəsinə baxsa daha yaxşıdır. Aralarından eləsi olsa ki, öz xüsusi istedadıyla üzə çıxsa, bu başqa məsələdir”.

Nə yalan deyim, bu fikirlərdə qəribə, qeyri-adi, qadınları incidəcək heç nə görmədim.

Çox aydın şəkildə deyilmiş vahid bir fikir var burada:

“İstedadı, savadı, bacarığı olan qadın işləsin, bunlar yoxdursa, oturub evində uşağına, ailəsinə baxsın”.

Guya qadınlar özləri belə düşünmürlər ki?

İstedadı, savadı, bacarığı olmadan necəsə, niyəsə qabağa çəkilən həmcinslərini görəndə qıcıqlanmırlar?

Özləri o cür qadınlara qəzəblənmirlər?

Hansısa qadın savadı, istedadı, bacarığı ola-ola kölgədə qalır, başqa həmcinsi isə hansısa yollarla “qabağa gedir”.

Deyənlər var ki, "Kamal Abdulla rektordur, rektor belə fikir səsləndirməməlidir".

O insanlar o zaman haqlı olardılar ki, Kamal Abdullanın rektor olduğu universitetdə qadınlara qarşı cinsi ayrı-seçkilik olduğunu eşidərdik. Eşidərdik ki, universitet rektoru qadın müəllimləri işdən çıxarır, qadınları işə götürmür. Amma bilirəm ki, Dillər Universitetində kollektivin böyük əksəriyyəti elə qadınlardır.

Yəni bir yazıçının müsahibədə səsləndirdiyi fikirləri kontekstdən çıxarıb yarımçıq formada başlığa vermək düzgün deyil. Bəlli məsələdir, sosial şəbəkələrdəki adamların əksəriyyəti heç o linklərə tıklamır, açıb içini oxumur ki, görsün, söhbət nədir, necədir? Başlığa nə çıxarılıbsa, elə ona fikir bildirir. Onda da ortaya belə vəziyyət çıxır.

Müsahibəyə əvvəldən axıra kimi baxdım. Məncə, o müsahibədən müzakirəyə çıxarılası daha ciddi məsələlər var idi.

Elə məlum müsahibədə Kamal Abdulla AMEA ilə bağlı da maraqlı fikirlər səsləndirib. Bir yazıçının, bir universitet rektorunun ölkənin Elmlər Akademiyası haqqında dediyi fikirlərə münasibət bildirmirlər, amma qadınlar haqqında dediyi hansısa cümlə kontekstdən çıxarılıb müzakirə edilir.

Necə ağlamayasan bu cür adamların halına?

Ona görə də deyirəm, yaxşı ki, sosial şəbəkələr var, boş-bikar, heç bir işə yaramayan adamlar öz aləmlərində nəyisə müzakirə edirlər, əsəbiləşirlər, qışqır-bağır salırlar.

• “Şirvannəşr"in xatirələrdə yaşayan binası - Coşqun Xəliloğlu
• Qəbələdə XV Beynəlxalq Musiqi festivalının növbəti konsert proqramı keçirildi
• Yolüstü söhbət – Saday Budaqlının hekayəsi