Məhəmməd Peyğəmbərin adı yazılan qədim daş tapıldı

Media

Ana səhifə
Media

Məhəmməd Peyğəmbərin adı yazılan qədim daş tapıldı

26 avqust 2026

13:30

Türkiyənin Mədəniyyət və turizm naziri Mehmet Nuri Ersoy UNESCO-nun Ümumdünya Mədəni İrsi Siyahısında yer alan Ani arxeoloji ərazisindəki Səlcuqlu qəbiristanlığında kufi xətti ilə altı dəfə "Həzrəti Məhəmməd" adı həkk olunmuş bəzəkli daş tapıldığını açıqlayıb.

Kulis.az xəbər verir ki, nazir sosial şəbəkə hesabında Mövlud qəndili gecəsində paylaşılan bu unikal tapıntının Sultan Alparslanın 1064-cü ildəki fəthi ilə Anadoludakı Türk-İslam tarixinin qapısını açan Ani ərazisində gün üzünə çıxarıldığını bildirib.

Arxeoloji qazıntılarda tapılan və ölçüləri 51x21 santimetr olan bəzəkli daş qabartma texnikası ilə hazırlanıb.

Mərkəzindəki səkkizguşəli ulduz motifinin ətrafındakı yazı zolağında kufi xətti ilə "Hz. Məhəmməd" adı təkrar olunur.

Əsərin yalnız yarısı günümüzə qədər çatdığı üçün hazırda bu adlardan üçü aydın görünür.

Anadoludakı ilk Türk-İslam qəbiristanlığı sayılan ərazidə aşkar edilən və Səlcuqlu türbələrindən birinə aid olduğu ehtimal olunan bu memarlıq parçası Aninin Türk-İslam kimliyini, dönəmin inanc dünyasını və dəfn mədəniyyətini əks etdirən mühüm arxeoloji sənəd hesab olunur.

Oxşar bəzək kompozisiyalarına 1191-ci ilə aid Mama Xatun türbəsində, Malatya Ulu Cümə məscidində və Eşrefoğlu məscidində də rast gəlinir.