Martın 16-da Azərbaycan paytaxtının mərkəzində - “İçərişəhər” Tarix-Memarlıq Qoruğunda qədim Şərqi slavyan bayramı olan Maslenitsaya həsr olunan bayram şənliyi keçirilib.

Maslenitsa rus mədəniyyətinin məşhur bayramlarından biri kimi Böyük Orucluqdan (“Velikiy Post” adlanan dini pəhriz – red.) əvvəlki son həftədə qeyd olunur. 2024-cü ildə Maslenitsa 11-17 mart tarixlərinə təsadüf edir.

Kulis.az xəbər verir ki, bayram şənliyi Bakıdakı Rus evi, "Yaşlek" Azərbaycan Tatar Gənclər Mərkəzi və Moskva Həmvətənlər Evinin dəstəyi ilə Azərbaycan Rus İcmasının Respublika Şurası tərəfindən təşkil olunub.

Geosiyasi mövqeyinə, çoxəsrlik dinc yanaşı yaşama ənənəsinə və tarixi inkişaf xüsusiyyətlərinə görə Azərbaycan qədim dövrlərdən müxtəlif dinlərin nümayəndələrinin birgə yaşadığı məkana çevrilib. Bununla da dinlərarası, millətlərarası və mədəniyyətlərarası dialoqun inkişafı üçün unikal mühit və əlverişli şərait yaranıb.

Azərbaycandakı Rus İcmasının rəhbəri Mixail Zabelin deyib: “Azərbaycan hökumətinin və İçərişəhər qoruğunun rəhbərliyinin dəstəyi ilə, Bakının Maslenitsa bayram şənliyinə ev sahibliyi edən, paytaxt sakinlərini və qonaqlarını yenidən bir araya gətirən mərkəzi hissəsi İşərişəhərdir. Biz bu bayramı qeyd etməklə, Azərbaycan xalqının qədim dövrlərdən ona xas multikulturalizmini bir daha vurğulayırıq. Bu gün Maslenitsa bayramı Novruz ərəfəsində keçirilir və burada Azərbaycanda yaşayan müxtəlif xalqların nümayəndələri toplaşıblar. Masalarda göz oxşayan səməni bir daha onu sübut edir ki, biz təqvimdə demək olar üst-üstə düşən iki bayramı bir-birindən ayırmırıq”.

“Bu multikulturalizm Azərbaycan xalqının birliyi 44 günlük müharibədə, torpaqlarımızı erməni terrorçularından azad etdiyimiz zaman parlaq şəkildə özünü büruzə verdi. İndi isə viran qoyulmuş ərazilərin bərpası və çiçəklənməsi üçün çox böyük işlər aparılır”, - Zabelin əlavə edib.

Rusiya Federasiyasının Azərbaycandakı Səfirliyinin birinci katibi Pavel Kuznetsov qeyd edib ki, Bakının mərkəzində Rusiya mədəniyyətini əks etdirən bayram şənliklərinin keçirilməsi xüsusilə xoş təsir bağışlayır.

“Belə şənliklərdə Azərbaycan gənclərinin iştirakı gözəl ənənədir. Onlar həm konsert proqramından, şirniyyatlardan, yarmarkadan, həm də bütövlükdə xalqlar arasında əlaqələri möhkəmləndirən bu cür multikultural layihələrin əhəmiyyətini göstərən tədbirdən zövq alacaqlar” – diplomat bildirib.

Şirvanşahlar Sarayının əzəmətli divarları qarşısına toplaşan qonaqların xalq oyunlarını da əhatə edən animasiya proqramlarında iştirakı bu sözlərin təsdiqi oldu.

Şənliyin qonaqları "Yaşlek" tatar ansamblının həm rus xalq rəqsləri, həm də dünya xalqlarının rəqslərini özündə cəmləşdirən konsert proqramını xüsusi coşqu ilə qarşılayıblar. Konsertdə, həmçinin Bakı Musiqi Akademiyasının, Azərbaycan Dövlət Xor Kapellası və Dağıstandan olan “Suvar” ansamblının solistləri iştirak ediblər.

Maslenitsanın ən dadlı bəzəyi olan “blinçik” (yelapardı – red.) bu qədim bayramın rəmzidir. İnsanlar Günəşi təcəssüm etdirən bu nazik yağlı yuxanın xüsusi mənası olduğuna inanırlar. Buna görə də, onunla bağlı bir çox əlamət və inanc mövcuddur. İnanca görə, evin sahibəsi bu nemətlərdən nə qədər bişirərsə, gələn il Günəşli günlərin sayı da bir o qədər olacaq.

Bayram şənliyində ənənəyə görə, qonaqlara yüzlərlə blinçik, bişmənin arasına qoymaq üçün isə xama, qatılaşdırılmış süd və hətta qırmızı kürü təklif edilib. Axı, Maslenitsadan sonra “Böyük Orucluq” başlayır, ona görə də, ziyafət süfrəsi bol və zəngin olmalıdır!

• Saxta tabutlar, pulsuz Həştərxan nefti və güllələnən ziyalılar - Nərimanov haqda filmin pərdəarxası
• "Rollarının üzərində “Nəsibə Zeynalovanın istehsalı” möhürü var..." - Avropanın məşhur aktrisası ona nə demişdi?
• “Ədəbiyyat adamı - 2026” mükafatı təqdim edildi