Abdulla Şaiq adına Azərbaycan Dövlət Kukla Teatrında cari mövsümün, teatrın 90-cı mövsümünün təntənəli bağlanış və “Teatrın dostu” nominasiyası üzrə mükafatlandırma mərasimi təşkil olunub.

Kulis.az xəbər verir ki, Kukla Teatrının 90-cı teatr mövsümünü də uğurla başa vurmasından danışan teatrın direktoru, Əməkdar mədəniyyət işçisi Rəşad Əhmədzadə bu mövsümdə də olan uğurlu işlərdən və teatrın qastrol səfərlərindən, eləcə də beynəlxalq festivallarda çıxışlarından danışıb. Qeyd edib ki, koronavirus pandemiyası ilə əlaqədar məhdudiyyətlərə rəğmən istər onlayn tamaşa nümayişlərində, istərsə də məhdudiyyətlərin aradan qaldırılmasından etibarən kuklaçılar fasiləsiz olaraq balaca tamaşaçılar qarşısında tamaşalar, premyeralar, mədəni-sosial layihələr, kütləvi konsert və nümayişlərlə daim fəaliyyətdə olublar: "Mövsüm ərzində teatrımız Gürcüstanın paytaxtı Tbilisidə keçirilən beynəlxalq teatr festivalında uğurla təmsil olunaraq, üç diplom ilə təltif olunub. Teatrın yaradıcı heyəti, eləcə də “Oyuq” teatr-studiyasının fəalları Şuşada keçirilən Birinci Beynəlxalq Kulinariya festivalında uğurlu çıxışları ilə yadda qalmağı bacarıblar", - deyə teatrın direktoru bildirib.

Teatrın baş rejissoru, Əməkdar artist Qurban Məsimov mövsüm ərzində teatrın uğurlu fəaliyyətindən danışaraq gələcək üçün daha da böyük plan və işlərin olduğunu vurğulayıb: "Teatr müəssisəsi olaraq tamaşa planını, eləcə də müxtəlif mövzularda hazırladığımız səhnə işlərini də uğurla təqdim etmişik. 2021-ci ilin oktyabrından etibarən 4 tamaşanı ərsəyə gətirib, teatrsevərlərin ixtiyarına vermişik. Növbəti mövsümə də böyük sevgi və həvəslə hazırlaşırıq. Siz tamaşaçıları yenə fərqli tamaşalar, layihələr ilə sevindirəcəyik".

Teatrın baş rəssamı İqbal Əliyev çıxış edərək ümumən bu mövsüm ərzində teatrda qurulan tamaşalar haqında danışıb: "Bu gün teatr təmsilçiləri olaraq mövsümün bağlanışını bayram edirik. Bu xoş gündə sevincimizə qoşulan hər kəsə təşəkkürümüzü bildiririk".

Daha sonra “Teatrın dostu” nominasiyası üzrə teatrın seçilən əməkdaşları ilə yanaşı mövsüm ərzində Kukla teatrı ilə davamlı əməkdaşlıq edən bəzi mətbuat nümayəndələri də mükafatlarla təltif olunublar.

Tədbir bədii hissə ilə davam edib.

• Katibə işlədi, əsərləri 100-dən çox dilə tərcümə edildi - Uşaqların sevimli yazıçısı
• Müəmmalı şəkildə vəfat edən bəstəkar - Ermənilər niyə onu “şovinist” adlandırırdılar?
• “İrəvan xanlığının bölgə mətbəxi” kitabının ingiliscə nəşri təqdim olunub