Nizami Kino Mərkəzində “Kapitan və Xəzər dənizi” qısametrajlı tarixi-sənədli animasiya filminin premyerası olub.

Kulis.az xəbər verir ki, tədbirdə əvvəlcə şəhidlərin xatirəsi 1 dəqiqəlik sükutla yad edilib.

Animasiya və arxiv materiallarının hibrid işlənməsi ilə ərsəyə gələn film 1990-cı ilin 20 Yanvar gecəsi baş verən ümumxalq faciəsinə həsr olunub.

Tədbirdə çıxış edən mədəniyyət nazirinin müavini Səadət Yusifova qeyd edib ki, ekran əsəri Mədəniyyət Nazirliyinin tabeliyində fəaliyyət göstərən Azərbaycan Respublikası Kino Agentliyi tərəfindən 2023-cü ildə keçirilən “Dövlət sifarişi və dəstəyi ilə istehsal olunan film layihələrinə dəstək müsabiqəsi”nin qalib layihələrindəndir.

Nazir müavini 1990-cı il yanvarın 19-dan 20-nə keçən gecə baş verən faciənin ağrı-acıları barədə dəqiq faktları diqqətə çatdırıb: “Faciə nəticəsində 147 nəfər öldürülüb, 744 nəfər yaralanıb, 841 nəfər qanunsuz olaraq həbs edilib, yüzlərlə insan isə itkin düşüb. 20 Yanvar faciəsi xalqımızın yaddaşında hüzn və kədər, qürur və qəhrəmanlıq səhifəsi kimi qalıb”,- deyə S.Yusifova əlavə edib.

O, milli tarixi faktların senzurasız şəkildə gələcək nəsillərin yaddaşına köçürülməsinin son dərəcə vacib olduğunu vurğulayıb. Nazir müavini söyləyib ki, faciələrin cəmiyyət tərəfindən düzgün dərk edilməsi mühümdür.

Film Fondunun direktoru Cəmil Quliyev sənət adamlarının bu faciəyə yanaşmalarından söhbət açıb: “Tarixi faciənin bədii salnaməsi “Azadlığa gedən yollar”, “Şəhidlərdən şəhidlərə”, “Matəm”, “Qanlı Yanvar” kimi filmlər hesab olunur. Təqdim olunan yeni ekran işi də bu mövzuda çəkilib. Film Xəzər Dənizi Neft Donanması kapitanlarının, eləcə də həmin tarixi hadisələri həyatlarını riskə ataraq lentə alan jurnalist və operatorların göstərdiyi qəhrəmanlıq, peşəkarlıq və vətəndaşlıq mövqeyindən bəhs edir. Tarixi faktlara əsaslanan ekran işi yaddaşın qorunması və həmin gecə baş verənlərin gələcək nəsillərə ötürülməsi baxımından xüsusi əhəmiyyət daşıyır”.

Daha sonra qonaqlar filmi izləyiblər.

Animasiya hissəsi “Harmony of Chaos” studiyasında hazırlanan filmə “Current Time” TV, İctimai TV və Azərbaycan Kinematoqrafçılar İttifaqı da dəstək göstərib. “Rental Azərbaycan” MMC tərəfindən istehsal olunan filmin rejissoru və ssenari müəllifi Türkan Hüseyn, prodüseri Emil Nəcəfovdur.

• Poeziya gecəsi: “Mənim dostum Səməd Vurğun”
• Bu gün Ümumdünya Rok-n-Roll Günüdür
• Lüğətə 1700 söz əlavə edən, kart oynamağı və şirniyyatı sevən dramaturq - Şekspir haqqında bilinməyən 15 fakt