Azərbaycan Dillər Universitetinin rektoru, akademik Kamal Abdullanın Ulu öndər Heydər Əliyevin 100 illik yubileyinə həsr olunan “Heydər Əliyev və multikultural təhlükəsizlik” kitabı işıq üzü görüb.

Kulis.az-ın məlumatına görə, kitabın annotasiyasında qeyd olunub ki, dövlətin milli təhlükəsizlik sisteminə bir sıra komponentlər daxildir. İqtisadi təhlükəsizlik, qida təhlükəsizliyi, enerji təhlükəsizliyi, nəqliyyat təhlükəsizliyi, ekoloji təhlükəsizlik və s. hər biri dövlətin yaşaması üçün vacib şərtlərdir. Həmin siyasətin tərkib hissələrindən biri kimi mənəvi, ideoloji işin aparıcı amillərindən hesab edilən multikultural dəyərlərin qorunmasını və bunun əsasında formalaşan multikultural təhlükəsizlik sistemini də bu konsepsiyaya bir komponent kimi əlavə etmək olar. Ölkə başqa sahələrdə öz milli təhlükəsizliyini təmin etdiyi kimi, multikultural təhlükəsizliyini də yaratmalıdır. Azərbaycanda dövlət siyasətinin bu əhəmiyyətli, vacib sahəsinin formalaşdırılması Heydər Əliyevin siyasi tərcümeyi-halına daxildir.

XI fəsildən ibarət olan kitabın “Multikultural təhlükəsizlik konsepsiyası Azərbaycanın dövlət siyasətidir” adlı I fəslində akademik Kamal Abdulla yazır:

“Müasir dövrdə Heydər Əliyev idealları etibarlı, münbit zəmində inkişaf etdirilir. Bunun müəllifi onun siyasi varisi, Azərbaycan Respublikasının Prezidenti, qalib Ali Baş Komandan İlham Əliyevdir. Ulu Öndərin ideyalarını və irsini mükəmməl mənimsəyən, onların həyata keçirilməsində yeni-yeni uğurlar qazanan İlham Əliyev çağdaş zamanımızda multikultural dəyərlərin himayəçisi kimi çıxış edir. Azsaylı xalqların, dini konfessiyaların hüquqlarının qorunmasında, mədəni müxtəlifliyin saxlanılmasında, Azərbaycanın multikultural həqiqətlərinin qlobal miqyasda təqdimində Prezident İlham Əliyevin cahanşümül fəaliyyəti göz önündədir.

Ulu Öndərin fasiləsiz titanik fəaliyyəti getdikcə daha çox bəhrə verir, Azərbaycanın inkişaf və tərəqqisinə əvəzsiz xidmətlərini göstərir. Onun ideya və fikirləri bu gün də yolgöstərəndir, respublikanın yüksəliş və inkişafı yolunda sönməz bir mayakdır”.

“Sim-sim” nəşriyyatı tərəfindən işıq üzü görən yeni nəşrin elmi redaktorları ADU-nun Multikulturalizm mərkəzinin müdiri Loğman Əliyev, Bakı Beynəlxalq Multikulturalizm Mərkəzinin Analitika şöbəsinin müdiri Rəşad İlyasov, korrektor Şəlalə Nəqşanidir.

Kitabda həmçinin Rəcəb Tayyib Ərdoğanın, Vladimir Putinin, Corc Buşun, Toni Bleyerin, Gerhard Şröderin Ulu öndər Heydər Əliyevlə bağlı fikirləri də öz əksini tapıb.

• Britaniyanın “Avroviziya”dakı uğursuzluğu araşdırılacaq
• Məhəmmədhüseyn Şəhriyarın “Heydərbabaya salam” poeması özbək dilində
• Ağır xəstəliklə mübarizə aparan Selin Dion səhnədə göz yaşlarına boğuldu