14-18 oktyabr 2024-cü il tarixlərində Özbəkistanın Daşkənd şəhərində keçirilən X Beynəlxalq Müasir İncəsənət Biennalesində Azərbaycanlı iştirakçı Məhbarə Abbasovanın "Görünməyən aləmlər" kurator layihəsi ikinci yerə layiq görülüb.

Kulis.az xəbər verir ki, ekspozisiyada nümayiş edilən video-art nümunələri aşağıdakılar idi: 1) "Görünməz/görünən dünya" - Nərgiz Əsgərova, Emin Mathers və Şəlalə Salamzadənin rəqəmsal işlərindən ibarət 2:33 dəqiqəlik ümumi video; 2) Nərgiz Əsgərovanın "Uyuyan Əjdaha" seriyasından nanoart, 00:05 dəqiqəlik hərəkətdə rəsmi; 3) Emin Mathersin "A2-2 ekzoplanetinə ekspedisiya" səsli video incəsənət nümunəsi və 4) Şəlalə Salamzadənin 02:21 dəqiqəlik "Naməlum ərazi" video və qlitç-art işi nümayiş edilirdi.

Özbəkistan Rəssamlıq Akademiyasının təşkilatçılığı ilə keçirilən Biennaledə ümumilikdə 42 ölkədən 60-dan çox rəssam və kurator iştirak edirdi. Biennale çərçivəsində münsiflər heyəti beş fərqli ölkədən dəvət edilmişdi. Biennalenin kuratoru sənətşünaslıq üzrə fəlsəfə doktoru Suxrob Kurbanov idi.

Biennalenin təntənəli bağlanış mərasimində qran-pri mükafatına fotoqraf Vladimir Qonçarenko (Özbəkistan), 1-ci yerin qalibi yaradıcı duet olan Mirvohid Mirsayidov və Ruşanə Alimova (Özbəkistan), 2-ci yerə Məhbarə Abbasovanın kurator layihəsi (Azərbaycan) və 3-cü yerə Ketrin Sara Yanqın video-art və instalyasiyası (Avstraliya) layiq görülüb, 10 nəfər iştirakçı isə həvəsləndirici diplomla təltif edilib. Qeyd edək ki, bütün iştirakçılara həmçinin sertifikatlar təqdim edilib.

• Burda rəvamıdır gülmədən ölmək! - Günün şeiri
• Kamal Abdullanın "Gizli Dədə Qorqud" kitabının müzakirəsi keçiriləcək
• Kinematoqrafçılar İttifaqına yeni sədr seçilməsi üçün qurultay keçiriləcək