Həmişə sonda ölür ayrılıqlar... – Şahnaz Şahinin şeirləri

Həmişə sonda ölür ayrılıqlar... – Şahnaz Şahinin şeirləri
28 sentyabr 2022
# 18:20

Kulis.az Şahnaz Şahinin şeirlərini təqdim edir.

Yaylıq

Yaylığını gətirmişəm özümlə,
Üstüm,başım ətirinə bulaşıb.
Dolayıram boğazıma soyuqda,
Bilsən məni necə isti saxlayır..!

İşə gedir,gücə gedir mənimlə,
Toxunuram,baxışları süzülür.
Sevinirəm,sevincimə şərikdi,
Qəmlənirəm,incə qəlbi üzülür..

Yaylığınla danışıram arabir,
Söhbətimiz yaman tutur ,biləsən..
Hərdən elə səninçün də darıxır.
Qəhərlənir,gözü dolur deyəsən...

Hərdən açıb başım üstə uçuram..
Kəpənəklər çiçəklərə yığışır..!
Sığallayıb sinəm üstə sıxıram,
Neçə istək bir-birinə qarışır...

Evimizin baş ucundan asmışam,
Yaylığınla çəkdirdiyim şəklimi...
Hər gün məni qarşılayır,ötürür-
Yaylığınla ovuduram təkliyi...!!

Sən gəldin

Sən gəldin dünyamın qarışan vaxtı
Gözləyib getmişdi arzularım da.
Nə bir işıq vardı tutub getməyə
Nə bir kölgə yoxdu daldalanmağa.
Eləcə günəş ta yandırıb yaxdı
Qəfildən Ay düşüb əlimi sıxdı.
Havalar da birdən soyudu onda
Uşaqlar elə tez böyüdü onda..
Gəlişi gözəldi,nə olsun dərddi
Nə olsun qadadı,qada alan yox.
Sağımda dəli bir inam var idi
Solimda sən vardın,görən bilən yox..
Açarı itmiş bir qapı kimiydim
Suları bulanmış çay idim Allah
Cismi didik-didik şəhid misalı
Ruhu ucalara tay idim Allah
Sonra ta sən gəldin,qarışdı aləm
O yanda Leylaya faş oldu naləm..
Bu yanda Şirini qınaq etdilər
Hə bir də Allaha bəlliydi halım..
Sonra da sonra da..eh daha heç nə
Nə gördü gözlərim nə gördü..saxta
Nə bir iz qalmışdı çıxıb getməyə
Nə də qayıtmağa bir yol yox idi


Payız

Özünü qapımdan asıb getdi payız..
Qış dəfn edəcək heyif,
nəm tutan yarpaqları...
Boz sərçələr ağlayacaq ,
bumbuz əllər dikəldəcək
başdaşlarını...
Salxım söyüdlər də qocaldı
kölgəsində görüşən sevgililər kimi...
Ara-sıra
boyat xatirələr tökülür
vitrindən indi....
Daha sahilə yaxın
uçmur balıqlar....
Üzünü yumur dalğalar,
dili batmış dənizlərin ...
Eh...Həmişə sonda ölür
ayrılıqlar...

İki şəkil

Şəkil-şəkil böyütdüm səni gözlərımdə
Sonra götürüb asdım başım üstdən,..
Başım üstdə iki şəkil var indi
Biri Allahımdı,o biri də sən..

Biri yaxındadı ,biri uzaqda
Biri istidədi, biri ayazda
İndi nə soyuqdan qorxum var
Nə çəkirəm payzdan..

Hələ də kürəyimi yay yandırır
Sinəmdə qış şaxta qovurur..
Hələ də yaz gəlməmiş
Küləklər küləş sovurur..

Hələ də çərçivəsizdi şəkliniz..
Sənin də Allahın da..
Hələ də insaf gözləyirəm
Səndən də …Allahdan da.

Sənin üçün

Təkəm yenə bu axşam.
Sən də hardasa təksən...
Musiqi dinləyirəm,
Musiqi dinləyirsən...
Bəlkə də ayrı-ayrı
Şopeni dinləyierik.
Biz zamandan qopmuşuq
Zamanı neyləyirik...
Nə məni tanıyırsan,
Nə tanıyıram səni...
Bəlkə məndən böyüksən
Bəlkə kiçik...
nə bilim..!
Bəlkə doğulmamısan
Heç..
Tanrı yanındasan..
Bəlkə yad bir adamın
Soyuq qucağındasan..
Hər sabah ümid doğur
Axşam ölür içimdə..
Hər gün kədər şumlayıb
Ağ gül əkir saçımda...
Bu gün də sənsiz keçdi
Yenə görüşmədik biz...
Ömrümüz bir teatr,
Tamaşa gedir səssiz...!

# 1278 dəfə oxunub

Oxşar xəbərlər

Şuşada növbəti Vaqif Poeziya Günləri başlayıb - Fotolar

Şuşada növbəti Vaqif Poeziya Günləri başlayıb - Fotolar

15:25 18 iyul 2024
Aliment ödəyə bilmədiyi üçün özünü asan gənc - Evlilik faciəsi

Aliment ödəyə bilmədiyi üçün özünü asan gənc - Evlilik faciəsi

14:30 18 iyul 2024
Şuşaya gedənlərin əksəriyyəti... - Nadir Yalçından etiraz

Şuşaya gedənlərin əksəriyyəti... - Nadir Yalçından etiraz

12:20 18 iyul 2024
Amerikan ifaçı ABŞ himnini sərxoş halda oxudu

Amerikan ifaçı ABŞ himnini sərxoş halda oxudu

11:40 18 iyul 2024
Həkim səhlənkarlığının qurbanı olan Xalq artistimiz - Maraqlı faktlar

Həkim səhlənkarlığının qurbanı olan Xalq artistimiz - Maraqlı faktlar

20:00 17 iyul 2024
Elnarə Akimova deputatlığa namizəd oldu

Elnarə Akimova deputatlığa namizəd oldu

18:38 17 iyul 2024
# # #