“Atamın sənətdəki yolunu nəsildən heç kim davam etdirmir. Heç birinin səsi atamın səsi qədər gözəl olmayıb. Olsaydı, bu sənətin ardınca gedərdilər. Atamın əmisi çox yaxşı oxuyan olub. Atam bu haqda kitablarında da yazıb. Elə atamda da sənətə həvəs əmisindən gəlib. Əlibaba müəllimin nəticələri, yəni mənim nəvələrim instrumental alətlərdə ifa edirlər, təhsil alırlar. Oğlan nəvəm klarnet ifaçısı kimi artıq toylara gedir”.

Kulis.az xəbər verir ki, bu sözləri Xalq artisti Əlibaba Məmmədovun qızı Rəqsanə Məmmədli deyib.

O əlavə edib:

“Atamın mahnılarının varisi mənəm. Hətta Əqli Mülkiyyət Agentliyindən məni axtarıb tapdılar və bildirdilər ki, atanızın mahnılarından gələn qonorarlara görə mütləq şəkildə hesab açdırmalısınız. Mən də gedib bankda hesab açdırdım. Hələ ki, ora heç bir məbləğ gəlməyib. Mahnı oxuyanda məndən heç kim icazə almır. Heç kimə qadağan da edə bilmərəm ki, oxuma. Yaxşı oxusunlar. Arzum budur ki, atamın mahnılarını onun yazdığı kimi ifa etsinlər, qol-qabırğasını sındırmasınlar. Atamın bütün mahnılarının sözləri yadımdadır, hamısını əzbər bilirəm. İndi axı dəbdədir, cürbəcür ritmlər qatırlar mahnılara. Nəsə improvizə etmək istəyirsinizsə, yeni mahnı yaradın və edin. “Dəşti” təsnifini atam yaradıb. Xalq artisti Simarə İmanova bu mahnını oğlunun toyunda onunla elə gözəl ifa etdi ki. Bir neçə dəfə özüm dinləmişəm. Bilirəm ki, hamının da xoşuna gəlib”.

Moderator.az

• Azərbaycanlı rejissorun ekran əsəri Kazan Film Festivalında iştirak edir
• Dövrünün rekordçu filmləri yenidən ekrana qayıdır
• "Sarayevonun qəlbi" mükafatı Meq Rayana verildi