"Çox təəssüf edirəm, bəzən cəmiyyət bilib-bilmədən kimisə və ya nəyisə qınayır. Türklər demişkən: çox önyarqılı olmuşuq. O qulağına sırğa taxılan müəllimin videosunu gördüm. Bəlkə də bu yaşınadək müəllimin qulağına taxılan ilk qızıl sırğadır".

Kulis.az xəbər verir ki, bu sözləri aktyor Elcan Rəsulov özünün instaqram hesabında yazıb. O, bir neçə gündür gündəmdən düşməyən valideynlərin qızıl hədiyyə etdiyi Xırdalan şəhər 1 nömrəli tam orta məktəbin ibtidai sinif müəllimi Yaqut Ağamalıyevadan bəhs edib və sözügedən müəllimin ssenarist Faiq Ağamalıyevin anası olduğunu vurğulayıb:

"Bu qənaətə haradan gəlirəm deyəcəm sizə. Əslində mən belə sirri açmağı sevmirəm, bəlkə də bu yazını görəndən sonra o özü də pis olacaq, deyəcək, kaş ki, Elcan bunu yazmazdın. Amma gəlin deyim sizə. Bayaq dostların söhbətində qulaq şahidi oldum ki, həmin müəllimə incəsənət sferasına yaxından tanış olan Faiq Ağamalıyevin anasıdır. Yaxın dostluq münasibətim olmasa da, Faiqi 20 ilə yaxındır tanıyıram. Qış aylarında, yəni serial mövsümündə seriallarda senarist işləyir, yay gələn kimi başını götürüb gedir bölgələrdəki istirahət mərkəzlərində animator işləyib ailəsini dolandırmağa çalışır.

O qədər abırlı və tərbiyəli uşaqdır ki, "ailə tərbiyəsinin ən bariz nümunələrini özündə cəmləşdirib" desəm az olar. Bəlkə də o evdə heç vaxt "rüşvət" sözünü eşitməyib. Bir də abırlı adam baxan kimi bilinir axı. Rüşvət girən ev də, o evdən çıxan uşaq da uzaqdan bilinir, belə şeyləri gizlətmək olmaz. Ən azından övladının altına rüşvət pulu ilə sınıq-salxaq bir maşın alıb qoyardı anası. Xırdalana gedən bütün avtobuslar Faiqi yaxşı tanıyır. Həqiqətən çox pis oldum. Kaş ki, mən bu söhbətə qulaq şahidi olmazdım. Bu balaca sirləri də burada açmazdım. Bir anlıq da təsəvvür elədim, o cür abır, həya sahiblərinin belə şərə düşməsini. İnsanın ürəyi dayanar, hamıdan xəbərsiz. Bilmədən günahkar olarıq. Bir də ki, müəllim mənim övladıma yaxşı təhsil versin, mən elə hədiyyənin ən yaxşısını ona alaram".

Qeyd edək ki, sosial şəbəkələrdə 1 saylı Xırdalan tam orta məktəbin 4-cü sinif müəllimi Yaqut Ağamalıyevanın valideynlərə özünə qızıl aldırması ilə bağlı iddialar yayılıb.

• “Soyuq müharibə”nin rejissoru yeni filmlə qayıdır
• "44" bədii filminin xüsusi tizeri yayımlandı
• Tanınmış aktyor Amerikada seriala çəkiləcək - Qadağalardan sonra