İnvestisiya fəaliyyəti ilə məşğul olan platformada valyuta alqı-satqısı həyata keçirməklə gəlir əldə etmək istəyən üç nəfərin külli miqdarda pulunu ələ keçirməkdə təqsirləndirilən Nizami Alışanın cinayət işi üzrə məhkəmə prosesi keçirilib.

Kulis.az xəbər verir ki, Bakı Ağır Cinayətlər Məhkəməsinin hakimi Aytən Əliyevanın sədrliyi ilə keçirilən prosesdə prokuror ittiham aktını səsləndirib.

Məlum olub ki, o, "İnvest.az" platformasına gəlir yatırım edib pul qazanacaqları adı ilə zərərçəkmiş şəxslərin vəsaitlərini ələ keçirib və vədinə əməl etməyib.

Nizami Alışan özünü təqsirli bilməyib.

Onun vəkili məhkəməyə vəsatət verərək təqsirləndirilən şəxsin 9-17 aprel 2024-cü ildə tarixini əhatə edən anten məlumatlarının müvafiq mobil operatordan əldə edilməsini istəyib.

Vəkilin digər vəsatəti "İnvest.az" şirkətinin nümayəndəsinin şahid qismində dindirilməsi ilə əlaqədar olub.

Məhkəmə müşavirə əsasında qərara alıb ki, hər iki vəsatət digər mərhələyədək baxılmamış saxlanılsın.

Növbəti proses fevralın 10-na təyin edilib.

Qeyd edək ki, iş üzrə zərərçəkən qismində 3 nəfər - Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilov tanınıb.

Təqsirləndirilən Nizami Alışan asan pul qazanmaq istəyən şəxslərə özünü səhm və valyuta alqı-satqısı ilə məşğul olan mütəxəssis kimi təqdim edib. Bununla da o, Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu ələ keçirib.

Zərərçəkmişlərə dəyən ümumi ziyan 2 milyon 445 min dollar (4 milyon 156 min 500 AZN) təşkil edir.

Ona Cinayət Məcəlləsinin 178.4-cü (dələduzluq - xüsusilə külli miqdarda ziyan vurmaqla törədildikdə) maddəsi ilə də ittiham irəli sürülüb.

Əlavə edək ki, Nizami Alışan AzTV-nin keçmiş sədri Arif Alışanovun qardaşı oğlu, hazırda Amerikada yaşayan müğənni Elariz Məmmədoğlunun isə kürəkənidir. Lent.az

• ADMİU-da İncə və Sənət təqdim edildi
• Xalq artisti Zaur Rzayev xəstəxanaya yerləşdirildi
• "O, adamların dərdinə uzaqdan baxmırdı..." - Qənirə Paşayevanın əziz xatirəsinə