Dəli bir ağlamaq keçir könlümdən - Nüsrət Kəsəmənli

Dəli bir ağlamaq keçir könlümdən - Nüsrət Kəsəmənli
17 aprel 2025
# 14:11

Kulis.az Nüsrət Kəsəmənlinin “Dəli bir ağlamaq keçir könlümdən” şeirini təqdim edir.

Yüyürüb, yüyürüb dərə boyunca
Düşüm çəmən üstə qoy üzüqoylu
Öpüm bu torpağı,
öpüm doyunca;
Üzümə üz qoysun bu soyuq daşı,
Qoy şehə qarışsın gözümün yaşı...
Qurumuş bulaqlar içir könlümdən,
Dəli bir ağlamaq keçir könlümdən.

Könlünə dəydiyim,
incitdiyim qız,
Vüqar kölgəsində yatdığım bəsdir,
Odlu yanağından su içdiyim qız,
Bu qədər günaha batdığım bəsdir.
Daha dodaqların titrəməsin qoy,
Mən sənin qarşında titrəyim, əsim,
Səndən dünyaları istəmirəm, yox,
Məni bağışlasan, bəsimdir, bəsim.
Yan desən,
Alışıb yana bilərəm.
Don desən,
Yerimdə dona bilərəm!
İndi bilmişəm ki, ömür-gün gedir,
Ən gözəl hisslərim keçir könlümdən,
Qayıt!
Sən ömrümə təzəlik gətir;
Dəli bir ağlamaq keçir könlümdən.

Çoxdan qəbiristana düşməyir yolum,
O tənha məzarı ot basıb bəlkə.
Mənim soyuqluğum laqeydliyim
Onun sinəsinə od basıb bəlkə.
Bir daş var gözümün yaşına həsrət,
Dayanıb o giley heykəli kimi.
Əlim torpağına, daşına həsrət,
Yıxılıb üstünə mən dəli kimi
ağlayam gərək.
O tənha məzarı torpaqdan üzüb
Ovcumun içində saxlayam gərək.
Şöhrətin üstünə yürüdükcə mən
İstəklər, arzular köçür könlümdən.
Sevgi dumanına büründükcə mən
Dəli bir ağlamaq keçir könlümdən.

Küləklər oynayır kənd evimizdə,
Tale baş götürüb aparır məni.
Hörümçək tor qurub pəncərəmizdə,
Həsrətim çırpınır o torda mənim.
Yarasa boylanır uçuq tavandan,
Bükülmüş dirəklər çat-çat olubdur.
Qorxudan divarın bağrı yarılıb
Qapılar çoxalıb dördqat olubdur.
Gedim divarına yalvarım onun,
Gedim qapıların qatı açılsın.
Gedim mən sonuncu dirəyi olum
Tavanlar çiynimə barı uçulsun...
Daşı daş üstünə qoyum təzədən.
Dəlisov küləklər əsir könlümdə!
Elə kövrəlmişəm,
Bilmirəm nədən
Dəli bir ağlamaq keçir könlümdən.

# 316 dəfə oxunub

Oxşar xəbərlər

Everesti fəth etmək üçün nə qədər pul xərcləməlisiniz?

Everesti fəth etmək üçün nə qədər pul xərcləməlisiniz?

21:00 23 may 2025
Mədəniyyət və İncəsənət Universiteti  “TÜRK DÜNYASI” Festivalında uğurla təmsil olunub

Mədəniyyət və İncəsənət Universiteti “TÜRK DÜNYASI” Festivalında uğurla təmsil olunub

20:53 23 may 2025
Leonardo Da Vinçinin qohumları tapıldı

Leonardo Da Vinçinin qohumları tapıldı

18:40 23 may 2025
Keçmiş əri Naibə Allahverdiyevanı döydü - Həbs edildi

Keçmiş əri Naibə Allahverdiyevanı döydü - Həbs edildi

18:05 23 may 2025
16 yaşlı oğlu dənizdə boğulan Nailə Mirməmmədli kimdir?

16 yaşlı oğlu dənizdə boğulan Nailə Mirməmmədli kimdir?

17:40 23 may 2025
“Farsca yazsan da, bu misralar türk ruhunu daşıyır” - Molla rejiminin ən çox qorxduğu azərbaycanlı kim idi?

“Farsca yazsan da, bu misralar türk ruhunu daşıyır” - Molla rejiminin ən çox qorxduğu azərbaycanlı kim idi?

15:00 23 may 2025
#
#
# # #