Kulis.az Vüqar Vanın “Damlanın fabulası ətrafında” adlı yazısını təqdim edir.

Damlanı son günlər cəsarətli foto-sessiyasına görə tənqid edir, lağa qoyur, ələ salırlar.

Nədir-nədir dünya ulduzlarını təqlid edir, şəkillərin “rəy” hissəni bağlayır, müasirliklə tərbiyəsizliyi səhv salır, özünü biabır eləyir.

Damlanın ciddi, yoxsa qeyri-ciddi sənətçi olması qalsın sonrakı yazılara, əcəl aman versə, ondan da danışarıq. İşimizin adı nədir?

Amma Damlanın cəsarətli və yaradıcı foto-sessiyasını tənqid atəşinə tutan, ələ salan, sənətçini təhqir edən psevdo-intellektuallara, çuşkalara və tabuları ilə yaşayan qardaş-bacılarımıza balaca bir cavab versəm, yaxşı olar.

Damlaya açıq məktub

Əziz Damla xanım, vaxtınızı çox almayacağam.

Əvvəla, sizi cəsarətinizə, yaradıcılığınıza, son vaxtlar gördüyünüz işlərə və duruşunuza görə alqışlayır, ürəkdən təbrik edirəm.

Bir var iş görənlər, bir var iş görə bilməyənlər.

Sən ağzınla quş tutursan, oxuyursan, yazırsan, öyrənirsən, bu bozluqda fərqli nəsə ortaya çıxarmağa çalışırsan, onlar da sənin gördüyün işlərə kənardan tamaşa edib, o işlərdə “yelçəkən”, zəif bir nöqtə, incə bir nüans axtarır ki, ələ salsın, lağa qoysun, məzələnsinlər.

Həmişə belə olub.

Həmişə belə olacaq.

Siz qətiyyən təhqirlərə, mənasız və haqsız tənqidlərə, yayılan dedi-qodulara əhəmiyyət verməyin, buna görə narahat olmayın. Artıq bu təhqirləri və tənqidləri görməzdən, bilməzdən gəlin.

Özünüz öz haqqınızı tapdalamayın.

Hər kəs sizi sevə bilməz.

Hər kəsin sevə biləcəyi adam xaraktersiz insandır.

Bir gün bir adam cənnətə düşür. Mələklərə deyir ki, mən cəhənnəmi də görmək istəyirəm? Mələklər razılaşır, kişini cəhənnəmə gəzməyə gətirirlər.

Kişi görür ki, üç yekə qazan var. Biri alman, biri fransız, biri türk qazanı. Qazanların içində insanlar qaynayır. Alman qazananından kimsə dırmaşıb çıxmaq istəyəndə, qazanın yanındakı zəbani yabası ilə vurub, adamı içəri salır. Fransız qazanından kimsə çıxmaq istəyəndə də, eyni şey təkrarlanır. Türk qazanına çatanda kişi görür ki, qazanın yanında yabalı zəbani yoxdur, üstəlik, heç kim də qazandan çıxmağa cəhd eləmir. Deyir ki, halal olsun, öz cəzaları ilə barışıblar, kişi kimi də çəkirlər. Yanındakı mələk deyir ki, türk qazanından kimsə çıxmaq istəyəndə, onsuz da, qazandakı digər adamlar ayağında tutub aşağı dartırlar, bizə ehtiyac qalmır deyə, onlara fikir vermirik.

Əziz Damla xanım, biz peyğəmbərinin üstünə qoyun qursağı atılan, dahiləri lağa qoyulan, təmiz adamları rişxəndlə alçaldılan dünyada yaşayırıq.

Çünki oldun dəyirmançı, çağır gəlsin dən, Koroğlu.

Siz hər zaman əlindən-dalından heç bir iş gəlməyən maymağın hədəfində olacaqsınız.

Bu yazını da ona görə yazıram ki, narahat olmayasınız.

Onlar da özünü belə yada salır, belə ifadə edir, kiminsə uğursuzluğunu görəndə iştahları açılır, şəkər-təzyiqləri qaydasına düşür, özlərini yaxşı hiss edirlər.

Allah eləməmiş, bir gün onlara iş görən, cəsarətli adamlar haqqında nə gəldi danışmaq qadağan olunsa, onlar ölə bilər.

Dediyim kimi, hərə öz işini görür və görməlidir.

Sizə uğurlar və hörmətlər.

Vüqar Van.

• "Coşqun həzzlə titrəyir hər bir hüceyrəm..." - Eston şairdən erotik şeir
• "Bir şeyi aydın deyə bilmirsənsə, deməli, onu özün də başa düşmürsən..." - Con Syorl
• Alman romantizminin vizual manifesti - "Duman dənizi üzərində səyyah"