Yanvarın 25-də Azərbaycan Dövlət Milli Gənc Tamaşaçılar Teatrında böyük rejissor, görkəmli sənətkar, Xalq artisti Cənnət Səlimovanın 85 illik yubileyi keçirilib.

Kulis.az xəbər verir ki, dövlət rəsmilərinin, mədəniyyət və incəsənət xadimlərinin, ictimaiyyət nümayəndələrinin iştirak etdikləri yubiley tədbirində teatrın direktoru Naidə İsmayılzadə çıxış edərək sənətkarı yubiley münasibəti ilə təbrik edib, onun həyat və yaradıcılığından, Azərbaycan teatrının inkişafındakı xidmətlərindən bəhs edib.

Gecədə professor, Əməkdar İncəsənət Xadimi Məryəm Əlizadə yubiliyarın teatr xidmətlərindən, pedaqoji fəaliyyətindən ətraflı söz açıb. Bildirib ki, Azərbaycan teatr sənətinin ən parlaq nümayəndəsi kimi Cənnət Səlimova quruluş verdiyi tamaşalarda özünəməxsusluğu və qüdrəti ilə seçilib. Onun səhnə əsərləri həm ölkəmizdə, həm də xaricdə böyük uğurlar qazanıb.

Teatr Xadimlər İttifaqının sədri, Xalq artisti Hacı İsmayılov yubiliyar haqqında səmimi fikirlər səsləndirib.

Daha sonra Cənnət Səlimova Teatr Xadimlər İttifaqı tərəfindən “Teatr xadimi” qızıl medalı ilə təltif olunub, sənətkarın həyat və yaradıcılığını əks etdirən mərhum rejissor Aydın Dadaşovun ekranlaşdırdığı “Çağırış” adlı sənədli film, “Hekayəti xırs quldurbasan” tamaşası nümayiş olunub.

• Amerikada sensasiya yaradan azərbaycanlı - O, KQB-nin təqibindən necə xilas olmuşdu?
• Məryəm Ələkbərlinin xatirəsinə həsr olunmuş sərgi açıldı
• Xocalı faciəsi qurbanlarının xatirəsi yad olundu