“Əgər Cəfər Cabbarlının adını rəsmi olaraq kinostudiyadan götürməyiblərsə, bəs niyə yayımlanan xəbərlərdə, loqoda onun adı öz əksini tapmamalıdır?”

Bu fikirləri Kulis-ə açıqlamasında görkəmli ədəbin nəvəsi Qəmər Bağırova deyib.

O, qeyd edib ki, hələ ötən il bu barədə dəqiq məlumat əldə etmək istəsə də, buna nail ola bilməyib:

“Cəfər Cabbarlının kino sahəsindəki fəaliyyəti vaxtilə qiymətləndirilib və “Azərbaycanfilm” kinostudiyasına onun adı verilib. Təəssüf ki, kinostudiyanın loqosunda ad əks olunmayıb. Mən inanmıram ki, loqoda Cabbarlının adının olmaması həmin quruma rəsmi dairələr tərəfindən tapşırılıb. Görünür, Cabbarlının adının loqoda əks olunmasını lazım bilməyiblər. Cabbarlı kino üçün çox iş görüb, amma adı loqoda yoxdur. Axı o elə bir şəxs olmayıb ki, kimsə onun adından utansın. Əksinə, Cabbarlının adı həmin quruma başucalığı gətirər. Əgər Cəfər Cabbarlının adını rəsmi olaraq kinostudiyadan götürməyiblərsə, bəs niyə yayımlanan xəbərlərdə, loqoda onun adı öz əksini tapmamalıdır? Loqoda və xəbərlərdə Cabbarlının adının qeyd olunmaması elə mənzərə yaradır ki, onun adını kinostudiyadan götürüblər”.

Kulis-ə açıqlama verən C.Cabbarlı adına “Azərbaycanfilm” kinostudiyasının direktor əvəzi, Əməkdar mədəniyyət işçisi, kino prodüseri Azər Quliyev bildirib ki, kinostudiya bu gün də Cabbarlının adını daşıyır: “Elə bir söhbət yoxdur və ola da bilməz. Cəfər Cabbarlının adının kinostudiyadan götürülməsi ağlasığılmaz məsələdir. Kinostudiya bu gün də Cəfər Cabbarlı adınadır. Təbii ki, bu hansısa xəbərdə əks olunmayıbsa, düz deyil”.
Məsələ ilə bağlı Azərbaycan Respublikasının Mədəniyyət Nazirliyindən bildirilib ki, “Azərbaycanfilm” kinostudiyasının Cəfər Cabbarlının adını daşıması bütün rəsmi yazışmalarda, blanklarda, press-relizlərdə, tədqiqat əsərləri və məqalələrdə tam şəkildə qeyd edilsə də, loqotipdə heç bir zaman öz əksini tapmayıb.

• Sosiologiyasız cəmiyyətin molla filosofları
• "Oskar" mükafatının aparıcısı açıqlandı
• "Eşref Rüya" serialı bu vaxt yayımlanacaq