Hər il aprelin 30-da dünya ictimaiyyəti bəşəriyyətin ən qədim incəsənət növlərindən biri olan heykəltaraşlıq ilə bağlı əlamətdar günü - Beynəlxalq Heykəltaraşlıq Gününü qeyd edir.

Kulis.az xəbər verir ki, bu bayram Beynəlxalq Heykəltaraşlıq Mərkəzi tərəfindən 2015-ci ildə təsis edilib.

Bayramın məqsədi heykəltaraşlığı bir sənət növü kimi populyarlaşdırmaq və insanlara məşhur heykəltəraşların yaratdıqları şedevrlər haqqında geniş məlumatlar təqdim etməkdir.

Azərbaycan da bəşər mədəniyyətinə görkəmli heykəltaraşlar bəxş edib. Son illərin araşdırmaları sübut edir ki, 1920-ci ilə qədər də Azərbaycanda heykəltaraşlıq əsərləri yaradılıb. Bu nümunələr həm xalq sənətkarları, həm də Rusiyada və Avropada təhsil almış peşəkar heykəltaraşlar, sənətşünaslar tərəfindən hazırlanıb. Azərbaycan Xalq Cümhuriyyəti dövründə də hələlik adları məlum olmayan heykəltaraşlar fəaliyyət göstəriblər. Məsələn, Dövlət gerbinin, bir sıra orden və medalların hazırlanmasında ilk peşəkar heykəltaraş Zeynal Əlizadənin fəal iştirakı olub. Azərbaycanda müasir peşəkar heykəltaraşlığının təşəkkülü prosesində Bakıda bir sıra monumental abidələr qoyulub, milli heykəltaraşlıq kadrları yetişib. 1920–1930-cu illərdə ilk azərbaycanlı heykəltaraşlar İbrahim Quliyev, Yelizaveta Tripolskaya və başqalarının iştirakı ilə Bakıda heykəllər qoyulmağa başladı. Hazırda akademik Ömər Eldarovun rektoru olduğu Azərbaycan Rəssamlıq Akademiyasında istedadlı heykəltaraşlar yetişdirilir.

Azərbaycanın professional heykəltaraşlığının inkişafı 1930-1940-cı illərdə daha da sürətlənib. Cəlal Qaryağdı, Fuad Əbdürəhmanov, Mirəli Mirqasımov, Tokay Məmmədov, Ömər Eldarov kimi görkəmli sənətkarların yaratdıqları əsərlər paytaxt Bakı və ölkəmizin digər şəhərlərini bəzəyir.

Qeyd edək ki, müasir dövrdə Azərbaycan heykəltaraşlığı XX əsrin ənənlələrindən bəhrələnərək yeni formalar axtarışındadır.

• Norveç kralı - Amos Ozun hekayəsi
• Vaxtaşırı geri dön, ey sevimli şəhvətim! - Məşhur yunan şairdən şeirlər
• “Sözün varsa, de!” filminin çəkilişləri davam edir