Azərbaycan Bəstəkarlar İttifaqında Xalq artisti, görkəmli bəstəkar və ictimai xadim Rauf Hacıyevin 100 illiyinə həsr edilmiş tədbir keçirilib.
Kulis.az xəbər verir ki, tədbirdə Azərbaycan Bəstəkarlar İttifaqının sədri, Xalq Artisti, AMEA-nın müxbir üzvü, professor Firəngiz Əlizadə çıxış edərək Rauf Hacıyevin yaradıcılığının və hərtərəfli ictimai fəaliyyətinin Azərbaycan musiqi mədəniyyəti tarixində mühüm yer tutduğunu, onun musiqili səhnə, vokal-simfonik, orkestr, kamera-instrumental əsərlərin, teatr tamaşaları üçün musiqilərin müəllifi olduğunu vurğulayıb.
Qeyd edilib ki, o, Azərbaycan cazının başlanğıcında dayanan, bu sahədə həm yaradıcı, həm də böyük təşkilatçılıq işləri aparanlardan biri olub. Onun gözəl "Azərbaycan", "Sevgilim", "Leyla" və başqa mahnıları dinləyicilərin rəğbətini qazanıb.
Tədbir zamanı Bakı Şəhər Mədəniyyət Baş İdarəsinin Rauf Hacıyev adına 15 nömrəli onbirillik musiqi məktəbinin şagirdləri Cəmil Sədizadə və Əbdüləli Hüseynli (müəllim Tamilla Məmmədova) bəstəkarın tanınmış melodiyaları əsasında hazırlanmış "Poppuri"ni (aranjiman Tamilla Məmmədova, Emil Əhmədzadə) pianoda ifa ediblər.
Tədbirin sonunda Rauf Hacıyevin nəvəsi Mirzə Rüstəmov çıxış edərək babasının xatirəsinə həsr olunmuş tədbirin təşkilinə görə Bəstəkarlar İttifaqının rəhbərliyinə təşəkkür edib.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
