Kulis.az Aqşin Yeniseyin "Uzun-uzadı cəhdlər və uğursuzluqlar!" yazısını təqdim edir.

Hələ 1989-cu ildə Bakıya neft dalınca gələn "Ramco" şirkətinin rəhbəri Stiv Rempə atası deyir:

"Uzun-uzadı davam edəcək cəhdlərə və uğursuzluqlara hazır deyilsənsə, sovet ittifaqına getmə".

"Uzun-uzadı cəhdlər və uğursuzluqlar!" Sovet cəmiyyətini xarakterizə edən bu qanqaraçılıqlar bu gün də post-sovet ölkələrinin sosial həyatından əl çəkmir.

Nə idi bu uzun-uzadı cəhdlərin və uğursuzluqların səbəbi?

Bolşeviklər öhdəsindən gələ bilməyəcəkləri bir yükün altına girmişdilər. Heç bir elmi, fəlsəfi, mənəvi baza olmadan yalnız inzibatı yolla yeni insan yetişdirmək istəyirdilər, yeni cəmiyyət qurmaq istəyirdilər.

Dindarlar kimi ateist kommunistlərin də bir kitabı vardı və o kitabda yalnız Leninin "ayələri" yazılmışdı.

Özlərinə qədərki bütün dünyəvi dəyərləri kəlləmayalaq etmişdilər. Bəşəriyyətin onlardan başlayacağı iddiasına düşmüşdülər. Dağıtmışdılar, qura bilmirdilər.

Heç bir şey yerində deyildi, ona görə sadə bir iş uzun-uzadı cəhdlər və uğursuzluqlar bahasına başa gəlirdi.

Bu gün də, məsələn, Azərbaycanda harada yubanma, durğunluq, qanqaraçılıq varsa, uzun-uzun cəhdlər uğursuzluqla nəticələnirsə, əmin olun ki, orada hələ sovet imperiyası dağılmayıb. Gedib dolablarını eşələsən, bəlkə, Kirovun zadın büstün də taparsan.

• Ölən qızının robotunu düzəldib özüylə yatıran dahi - Fəlsəfənin "ata"sını kim zəhərlədi?
• “Baxın kölgəsində” konsert proqramı təqdim olundu
• "Yuva" filmi yenidən nümayiş olunacaq