Azərbaycanın ABŞ-dakı səfirliyi və Azərbaycan Evi Vaşinqtonda keçirilən 11-ci Beynəlxalq Qış Sərgisində iştirak edib.

Kulis.az-ın məlumatına görə, Ronald Reyqan binası və Beynəlxalq Ticarət Mərkəzində təşkil olunmuş tədbirdə 68 ölkənin diplomatik nümayəndəlikləri qatılıb. Sərgidən əvvəl səfirlər üçün qəbul təşkil edilib. Daha sonra tədbirin rəsmi açılış mərasimi olub. Azərbaycanın ABŞ-dakı səfiri Xəzər İbrahim sərginin media orqanına ABŞ-Azərbaycan münasibətləri, eləcə də ölkəmizin zəngin tarixi, mədəni irsi və Azərbaycanda keçirilən beynəlxalq tədbirlər barədə məlumat verib.

Azərbaycanlı iş adamlarının, tələbələrin və icmanın digər təmsilçilərinin iştirak etdiyi sərgidə Azərbaycana məxsus pavilyonunda ölkəmizin mətbəxinə dair nümunələr, mədəniyyətini əks etdirən milli geyimlər, müxtəlif eksponat və suvenirlər, habelə qədim tarixi abidələr, müasir infrastruktur və turizm potensialına dair bukletlər, Azərbaycanda keçirilən bir çox beynəlxalq tədbirlər haqqında məlumatları əks etdirən şəkillər nümayiş etdirilib. Həmçinin qonaqlara ölkəmizin COP29-a uğurlu sədrliyi ilə bağlı məlumat verilib.

Azərbaycan pavilyonunda ABŞ-da fəaliyyət göstərən Azərbaycan icmasının nümayəndələri də iştirak ediblər. Azərbaycan Evinin üzvləri ziyarətçilərə ölkəmiz haqqında müxtəlif kitablar, jurnal və bukletlər paylayıblar.

Sərgidə iştirak edən qonaqlar Azərbaycan pavilyonunu xüsusi maraqla qarşılayıblar. (Azərtac)

• Respublika Uşaq Kitabxanasında yazıçı Zahid Xəlil ilə görüş keçirildi
• Qarabağ xanlığının tarixinə fərqli baxış - Əhməd bəy Cavanşir Vaqifin faciəsini necə təqdim etmişdi?
• “Kəkələmə rolları"na görə truppaya qəbul edilən aktyor - Bəşirin Səfəroğlu erası necə başlamışdı?