Azərbaycan Yazıçılar Birliyinin növbəti qurultayında sədrlik postuna yeni namizədlər bəlli olub.

Bu barədə APA-ya şair Emil Rasimoğlu və Fuad Cəfərli məlumat verib.

Emil Rasimoğlu qurumun və konkret indiki sədrin vəzifələrini doğru icra etmədiyini bildirib: “Bu gün Azərbaycan Yazıçılar Birliyindəki sistem AYB rəhbərliyinin maraqları naminə idarə olunur, daxili nizamnamə qaydaları isə kənarda qalıb. Təsəvvür edirsinizmi? Bir insanın alternativsiz şəkildə seçkiyə getməsinə yol açalar, onun əvəzolunmazlığını təbliğ edələr və sonda da deyələr ki, yekdilliklə səs topladı. Hansı ki öncəki qurultaylarda bu hallar olub. Mən bu detalı xatırlatmaqla onu demək istəyirəm ki, baxın, Anar bu illər ərzində sadəcə özünü bu şəkildə ilahiləşdirdi. Yəni bu illər ərzində bir istedadlı, idarəçilik bacarığı, potensialı olan şəxs olmadımı Anar 35 il bir kürsüdə əyləşdi? Həm də nöqsanlara yol verə-verə əyləşdi”.

Emil Rasimoğlu AYB-nin bölgələrdəki fəaliyyətindən və AYB-nin gənc imzalarla bağlı siyasətindən də narazıdır.

“Yazıçılar Birliyinin əyalətlərdəki filialları, sektorları, tabeçiliyində olan orqanların fəaliyyəti bərbad durumdadır. Digər tərəfdən, Anar gənclik deyə bir məfhum tanımır. Çünki gəncliyin yanında olmağı bacaran şəxs hələ ilk olaraq özü gəncliyin yolunu kəsməməlidir. Düşünürəm ki, artıq Yazıçılar Birliyinin Anarlı dönəmi bitməlidir”, – o bildirib.

Şair Fuad Cəfərli də builki seçkilər üçün namizəd olduğunu təsdiqləyib: “Bildiyiniz kimi, mən artıq 2019-cu ildən namizəd olduğumu bildirmişəm. Ondan sonra qurultay təxirə salındı, amma hazırda da namizədəm. Ümumiyyətlə, hesab edirəm ki, AYB-nin gənclərlə bağlı fəaliyyəti qənaətbəxş deyil. Biz 2019-cu ildə bu siyasəti tənqid etmişdik və yalnız ondan sonra müəyyən mənada gənclərə redaksiyalarda yer verildi. Amma Anarın özü 30-31 yaşında “Qobustan” jurnalında baş redaktor idi, Rəsul Rza isə 29-30 yaşında artıq qurumun sədri idi”.

Fuad Cəfərli “AYB-də Anardan başqa nüfuzlu adam yoxdur” fikrinə də münasibət bildirib: “Ümumiyyətlə, “AYB-də Anardan nüfuzlu adam yoxdur” ifadəsi, ən azından, Anarın öz nəsildaşlarına qarşı hörmətsizlikdir. Necə olur ki, o boyda İsmayıl Şıxlı sədrlikdən gedəndə AYB-yə bir qurum kimi hər hansısa bir zərər dəymədi, amma Anar AYB-dən getsə, dağılmış olsun? Bu cür ifadələr, fikrimcə, qətiyyən doğru deyil”, – o qeyd edib.

Qeyd edək ki, Azərbaycan Yazıçılar Birliyinin qurultayı 26 oktyabr saat 10:00-da Akademik Milli Dram Teatrında keçiriləcək. Birliyin hazırkı sədri Xalq yazıçısı Anar mediaya sədrlik üçün namizədliyini irəli sürdüyünü açıqlayıb.

• "Anam yaza biləcəklərinin yüzdə birini də yaza bilmədi" - Nigar Rəfibəylinin görünməyən taleyi
• Milli Tarix Muzeyində Birinci Türkoloji Qurultayın 100 illiyinə həsr olunmuş sərgi açıldı
• Dilçilik İnstitutu: "Yeni orfoqrafiya lüğətini izafət birləşmələrindən təmizləyirik"