Görkəmli el sənətkarı Aşıq Alının “Nə qaldı” kitabı “Qanun” nəşriyyatında ikinci dəfə çap olub.

Kulis.az xəbər verir ki, toplayanı və tərtib edəni İlham Qəhrəman olan kitab AMEA Folklor İnstitutu Elmi Şurasının qərarı ilə işıq üzü görüb.

2020-ci il nəşrindən fərqli olaraq tərtibçi ustadın yeni kitabına müxtəlif mənbələrdən əldə edilmiş 1 müxəmməs, 4 təcnis, 1 cinas gəraylı və 3 qoşmasını əlavə etmişdir. Ümumiyyətlə təkmilləşdirilmiş ikinci nəşrdə el arasında təcnis Alı kimi tanınan sənətkarın qələminə məxsus 309 şeir toplanmışdır. Şeirlərin janr bölgüsü aşağıdakı kimidir: ustadnamə 25, qoşma 131 (2 qoşayarpaq qoşma), güllü qafiyyə 2, gəraylı 23, cinas gəraylı 14, ayaq təcnis 8, təcnis 54, dodaqdəyməz təcnis 7, dodaqdəyməz cığalı təcnis 3, divani 28, müxəmməs 1, qəzəl 1, qıfılbənd və bağlamalar 4. Oxucular ikinci nəşrdə həmçinin Aşıq Alıya məxsus və kitabına ilk dəfə düşən qıfılbənd bayatılar və təsniflərlə də tanış olacaqlar.

Nəşrdəki mətnlər aşıq şeirinin formasına uyğun ardıcıllıqla düzülməklə 15 bölmədə yer almışdır. 400 səhifədə 500 tirajla çap edilən kitab İlham Qəhrəmanın “Könül işi” adlı ön sözüylə açılır. Əldə edilən mətnlərə tənqidi yanaşan tərtibatçı çoxsaylı deyim və sözlərə, dini-mifoloji məfhumlara aydınlıq gətirmiş, cinasları yenidən əslinə uyğun qurub şərh etmişdir.

Bundan başqa, oxucuya əlçatan olsun deyə kitabın sonunda “Sözlük” və “Lüğət” verilib. Kitabın redaktoru Əsəd Cahangir, rəyçi aşığın nəslindən olan şair Telman Hüseyn, məsləhətçilər Məhərrəm Qasımlı və Aşıq Nəbi Nağıyevdir.

Bu kitabla Aşıq Alı irsi ilk dəfədir ki, oxuculara tam şəkildə çatdırılır. Kitab folklorşünaslar, aspirantlar, tələbələr, orta məktəblərin ədəbiyyat müəllimləri, aşıq şeiri həvəskarları və geniş oxucu kütləsi üçün nəzərdə tutulmuşdur.

• Dünyanın ən varlı məşhurunun adı açıqlandı
• Eyfel qülləsinin orijinal spiral pilləkəninin bir hissəsi hərraca çıxarılacaq
• Yusif Eyvazov Mədəniyyət Nazirliyinə çağırıldı