“Hər şey düzələndən sonra dostunun maşınıyla Cəbrayıla, ordan da Şuşaya gedəcəklər.”

Bunları Kulis.az-a əslən Cəbrayıldan olan tanınmış şair Vaqif Bayatlı Odərin həyat yoldaşı Tamam xanım deyib. O daha sonra əlavə edib:

“Vaqif müəllim evdədir, heç yerə çıxmır. Karantinə görə onsuz da insanlar çölə az çıxır, Vaqif bəy isə ümumiyyətlə heç iki-üç saatlığa da çıxmır, bütün günü evdə olur. Səhhəti ilə bağlı onu Türkiyəyə yoxlanışa aparmalıydıq, pandemiya və mövcud vəziyyətə görə evdən çıxarmağa qorxuruq. Ona görə, həkimiylə Votsapda əlaqə saxladıq. Həkim dərmanlarının vaxtını uzatdı. İmmuniteti zəifdir deyə ora aparmaq mümkün deyil, eyni dərmanlarla müalicəsi davam edəcək. Gözləyirik bu COVİD-19 bəlası bitsin ki, aparıb yoxlanışdan keçirək, əməliyyatdan sonra vəziyyətinin nə yerdə olduğunu bilək”.

Tamam xanım bildirib ki, şair yaradıcılıqla da məşğul olmağa davam edir:

“Səhhəti imkan verən qədər yaradıcılıqla məşğul olur, yazır, pozur. Mətbuatı izləyir. Telefon zənglərinə də hərdən cavab verir. Jurnalistlərin suallarına da cavab verir. Bir neçə gün əvvəl bir sayta müsahibə də vermişdi. Yəni Allaha şükür, sağlamdı.

Keçən dəfə bir tələbə yoldaşı ilə danışırdı. Onunla böyük qələbəmiz haqqında çoxlu söhbət etdilər, çox həyəcanlandılar. Vaqif bəy vətənpərvər adamdır, ağladı da. Hətta sözləşdilər, hər şey düzələndən sonra dostunun maşınıyla Cəbrayıla, ordan da Şuşaya gedəcəklər. Allah qismət eləsin!”

• Corc Kluniyə fəxri "Qızıl Şir" veriləcək
• Menqsin şah əsərlərindən biri - "Çobanların sitayişi" nəyi izah edir?
• "Görünür, ağcaqanadlar müəllifi çox narahat edib" - Hekayə müzakirəsi