Xəbər verdiyimiz kimi, şair Salam Sarvan bu yaxınlarda meyxana ilə bağlı polemik fikirlər söyləmiş və istənilən iki meyxanaçı ilə deyişmək istədiyini bildirmişdi.

Bu fikirlər bəzi meyxanaçılar tərəfindən sərt reaksiyalar doğursa da meyxanaçı Vüqar Əbdülov News24.az-a açıqlaması maraqlı olmuşdu:

“Salam Sarvana hörmətim var. O tamam başqa bir şairdir. Bizim cızma-qaramız onun yazdıqlarının yanında böyük bir şey deyil. Onun belə bir söz deməsinə, açığı, mən təəccübləndim. Salam Sarvanla mənim sənətimin müqayisəsi doğru deyil. Onun öz yeri, mənim öz yerim. Əgər şəxsən desə ki, mən Vüqarla görüşəcəm. Mən onunla görüşərəm. Mübahisə, yarış xarakterli yox, bir-birimizə müəyyən sözlərimizi deyə bilərik. Onun da sözündə yəqin ki, böyük bir həqiqət var. Mən bütün meyxanaçıların adından danışmıram. Əksər meyxanaçıların deyişməsi, danışması mənim də ürəyimcə deyil. Sadəcə, dövrün tələbinə görə, hər kəsin öz auditoriyası var Kimisi sevgidən, kimisi Salam Sarvanın dediyi kimi, “qaqaşlıq”dan yazır. Özləri bilərlər. Salam Sarvanı şəxsən mən oxuyuram, izləyirəm. Onun yazdıqları tamam fərqli bir aləmdir. Mən Salam Sarvanın qarşısında kənara çəkilirəm”.

Şair Salam Sarvan isə bu açıqlama ilə bağlı Kulis.aza açıqlama verərək bunları söyləyib:

“Vüqar bəyə bizə verdiyi dəyərə görə təşəkkür edirəm. Təbii ki, onun “kənara çəkilmək” barədə fikrini sözün birbaşa mənasında qəbul eləmirəm. Əksinə, Vüqar bəyə minnətdarlığımı bildirirəm ki, meyxananın kütləvi təbliğinin fəsadları ilə bağlı narahatlığımızı anlayışla qarşılayır. Bu narahatlığımızın hansı dərəcədə əsaslı olması məsələnin başqa tərəfidir, əsas odur ki, Vüqar bəyin bu jesti xoşniyyətli münasibətdir, hörmətli meyxanaçımızın nəcibliyinə yaraşan hərəkətdir. Yəqin ki, bu yaxınlarda Vüqar bəylə bir çay süfrəsi arxasında oturub bu mövzuda dərdləşəcəyik. Meyxanaçı dostlarımız hansısa adada yaşamırlar, onlar da bu cəmiyyətin, bu məişətin içindədirlər və özüylə çöpü də, dirəyi də aparan təfəkkür sellərinin yaratdığı fəsadlardan onlar da əziyyət çəkirlər”.

• Türkiyəli müğənni 10 il müddətinə həbs oluna bilər
• Fətəli xan Xoyskinin qardaşı oğlu Türkiyəyə niyə qaçmışdı? - Xoyskilər ailəsinin bilinməyən hekayəsi
• Birinci vitse-prezident Mehriban Əliyeva və ailə üzvləri dünya şöhrətli skripkaçının konsertində