Kitabsevərlərin ən çox sevdiyi məkanlardan biri olan “Kibrit book cafe” fəaliyyətini dayandırıb.

Bu barədə Kulis.az-a kafenin sahibi Bəhruz Rüstəmxanlı məlumat verib. Onun dediyinə görə, hər şey iyunun 2-də “Kibrit”də baş vermiş yanğından sonra olub: “Həmin yanğın “Kibrit”dən başqa ətrafdakı digər dörd məkana da zərər vurdu. Yanğından bir neçə ay sonra ekspert rəyi çıxdı, rəydə göstərilmişdi ki, yanğın mətbəxdəki soyuducudan baş verib, amma heç bir normativ akt pozuntusu yoxdur. Yəni yanğına səbəb bizim məsuliyyətsizliyimiz deyildi. Ümumiyyətlə, həmin bina o yanğından əvvəl də qəzalı vəziyyətdə idi. Bununla bağlı bütün müvafiq dövlət qurumlarından yardım istədim ki, gəlib binanın vəziyyətinə baxsınlar. Təbii və təəssüf ki, heç bir orqandan cavab gəlmədi, heç kim gəlib baxış keçirmədi”.

B.Rüstəmxanlı daha sonra bunları söyləyib:

“Özüm bir usta tapıb binaya altdan dirəklər vurdurdum ki, üst mərtəbələr aşağı çökməsin. Binanın üst mərtəbələrində insanlar yaşayır. Sonra kafemizi təmir elədim. Üst qonşumuzun mənzilinə zərər dəymişdi, onları öz hesabıma düzəltdim. Qonşu obyektlərin təhlükəsizliyini təmin elədim. Yəni əlimdən gələn hər bir şeyi elədim ki, qonşular arasında narazılıq yaranmasın. Halbuki qərar elə idi ki, hər kəs öz obyektinə, mənzilinə dəymiş zərəri özü ödəməliydi. Kafe açıldı, ancaq qonşular imkan vermədi işləməyə. Hər dəfə daha çox nəsə etməyimi istəyirdilər. Tələbləri bitmirdi. Az qalsın bütün evlərini mənə təmir etdirmək istəyirdilər. Kafemizin mətbəxinə qəsdən su tökürdülər yuxarıdan, yararsız hala salırdılar. Deyirdilər ki, imkan verməyəcəyik işləməyinizə. Bu məni çox yordu, bezdirdi. Belə vəziyyətdə də “Kibrit” kafesini bağlamalı olduq. Bəlkə başqa daha uyğun bir məkanda yer tapsaq, yenidən kafemizin fəaliyyətini bərpa edəcəyik, amma hələ tapa bilməmişik”.

• Gənc Tamaşaçılar Teatrında “Qodo həsrətində” tamaşanın premyerası
• Prezident İlham Əliyev Fərhad Xəlilova “İstiqlal” ordenini təqdim etdi
• Prezident, birinci xanım və ailə üzvləri “Mənim Abşeronum: Üstə gəl” sərgisində