Son günlər dünyasını dəyişən məşhurlarımızın hər ikisi – bəstəkar, Əməkdar incəsənət xadimi Adil Bəbirov və aktyor, Xalq artisti Teymur Mirzəyev gözlərini vətəndən kənarda yumdu.

Gəzməyə qərib ölkə,
Ölməyə Vətən yaxşı...

Ancaq bəzən adamlar çarəsizlikdən qürbətdə ölürlər.

1990-cı illərin hərc-mərcliyi və onun ardınca mədəniyyət sahəmizin öz ayaqları üstündə dura bilməməsi bir çox mədəniyyət xadimlərini ölkədən perik saldı.

İş, karyera və s. səbəblərlə ölkəni tərk edən istedadlı şəxslərin bir çoxu öz sahələrində uğur qazana bilməyib unudulur.

Karyera quranların da bizə xeyri dəymir.

İxtisas sahibinin xaricə getməsi ölkəyə ciddi ziyandır, ancaq mədəniyyət üzrə ixtisaslaşmış birinin başqa ölkəyə köçməsi artıq ideoloji məsələdir.

Ölkənin mənəvi taleyinin asılı olduğu adamların bizimlə qalması özümüzə lazımdır, onlara yox.

Adil Bəbirov və Teymur Mirzəyevin birinin Kanadada, digərinin İsraildə dünyasını dəyişməsi ağrıdıcı haldır.

Onlar da istəyərdilər ki, doğulduqları, mahnı oxuduqları, sevdikləri bir şəhərdə vidalaşsınlar dünya ilə.

Ümid edək ki, mədəniyyət sektorumuz tezliklə qüsurlardan arınacaq, kino, musiqi, ədəbiyyat öz müstəqil əsasını təmin edəcək, yararlı mədəniyyət adamlarımız vətənimizə bənd olacaq çoxlu səbəblər tapacaqlar.

• Kinematoqrafçılar İttifaqına sədr seçilməsi üçün qurultayın tarixi məlum oldu
• Sənin gözlərinin dərinliyində... - Əliağa Kürçaylı
• Anarın ən müəmmalı əsəri - “Əlaqə”də gizlənən fəlsəfə