Martın 5-də Akademik Opera və Balet Teatrında Mədəniyyət Nazirliyi və Azərbaycan Dövlət Rəsm Qalereyasının təşkilatçılığı ilə rəssam və fotoqrafların “Harmoniya” adlı qrup sərgisi açılıb.
Kulis.az-ın Nazirliyin saytına istinadən verdiyi xəbərə görə, 8 mart - Beynəlxalq Qadınlar Gününə həsr olunan sərgidə 30-a yaxın rəssam, heykəltəraş və fotoqrafın 50-dən çox əsəri sərgilənib.
Azərbaycan Dövlət Rəsm Qalereyasının direktoru Qalib Qasımov Beynəlxalq Qadınlar Günü münasibətilə qadınları təbrik edib, onlara ən xoş arzularını çatdırıb. Bildirib ki, Mədəniyyət Nazirliyi, eləcə də Azərbaycan Dövlət Rəsm Qalereyası hər zaman Beynəlxalq Qadınlar Günü ərəfəsində xanımları təbrik etmək üçün belə sərgilər təşkil edir. Bu sərgi qadınlara, onların gözəlliyinə həsr olunub. Təsviri sənətdə rəssamlar hər zaman qadın obrazına müraciət ediblər. Azərbaycan qadını müasir cəmiyyətimizdə çox böyük yer tutur.
Qalereyanın direktoru deyib ki, bu sərgi təsviri sənətin müxtəlif sahələri ilə yanaşı, bədii fotoqrafiya sənətinə olan marağı artırmaq, cəmiyyətdə qadının yeri və roluna diqqət çəkmək məqsədilə həyata keçirilir. Sərginin ekspozisiyasında müxtəlif üslub və texnikalarda işlənmiş rəngkarlıq, heykəltəraşlıq və bədii fotoqrafiya nümunələri, o cümlədən Azərbaycan Dövlət Rəsm Qalereyasının fondundan seçilmiş əsərlər də nümayiş olunur.
Sərgidə əsərləri nümayiş olunan gənc rəssamlara uğurlar arzulayan Qalib Qasımov onların Azərbaycan rəssamlıq sənətində öz sözlərini deyəcəklərinə inamını ifadə edib.
Tədbirdə çıxış edən Xalq rəssamı Arif Hüseynov və Azərbaycan Dövlət Rəsm Qalereyasının baş elmi işçisi Vaqif Muğanlı sərgidə əsərləri nümayiş olunan müəlliflərə uğurlar arzulayıblar.
Sonra iştirakçılar sərgi ilə tanış olublar.
Sərgidə həmçinin “Parlaq” Yaradıcı Gənclər İctimai Birliyinin üzvləri musiqi nümunələri ilə çıxış ediblər.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər