Kulis.az Bakı şəhərinin keçirdiyi karantin günlərində təcili yardıma edilən qeyri-adi zənglərdən bir neçəsini təqdim edir. Material adının çəkilməsini istəməyən həkim və şəfqət bacılarının danışdıqları əsasında hazırlanıb.

Naməlum zəng:

- İşiniz təhlükəlidir! Çoxlu sarımsaq yeyin.

***

- Alo!

- Bəli!

- Ay bala, bu zibilə qalmış korona nə vaxt bitəcək? 85 yaşım var, hər axşam normal uzanıram, səhər dururam ki, nəvələrim məni üzü qibləyə çevirib.

***

Yaşlı qadın səsi:

- Alo. Təcili yardımdı? Eşitmişəm, Siz ölənlərdən də analiz götürürsünüz, düzdür?

- Xəstəliyin yayılmaması üçün edirik, bəli.

- Xahiş edirəm gəlin məndən analiz götürün.

- Qızdırmanız var?

- Yox. Heç nəyim yoxdu. Tək qalıram. Deyirəm, qəfil ölüb-eləyərəm, sizə zəng edən olmaz. Ya da ünvanımı yazın, zəng eləməsəm, gələrsiz.

***

Yaşlı kişi səsi:

- Alo! Təcili yardımdı?

- Bəli. Nəyiniz var?

- Bircə evim var, onu da bu biqeyrət oğlum arvadının adına keçirib.

***

Daha bir yaşlı qadın həkim çağırır və sözünün sonunda dönə-dönə tapşırır: “Xahiş edirəm, “sestra”ya deyin, iynədən sonra yanımı şapalaqlamasın.”

***

- Alo!

- Bəli!

- Mənim sənəddə yaşım 64-dür, amma əslində 66-yam. Küçəyə çıxa bilərəm?

***

Daha bir zəng:

- Alo! Koronavirusdur?

***

- Təcili həkim göndərin!

- Qızdırmanız var?

- Yox. Qəbzim var. Bayıra çıxanda əziyyət çəkirəm, qızdırmam qalxır.

***

- Alo! Evimizdə üç nəfər var, üçünün də qızdırması var.

- Bu saat həkim göndərərik.

- Nə həkim? Sosial yardım vermirsiniz siz?

***

Daha bir yaşlı kişi zəng edir, amma heç cür ünvanı deyə bilmir. Həkim soruşur:

- Yanınızda kim var?

- Arvadım.

- Verin onunla danışaq.

- O, laldır.

***

Daha bir yaşlı kişi ünvan deyir:

- Darvazamızın ağzındakı tut ağacının altına gəlin. Mən orda gözləyəcəm. Ağzımda ağ maska olacaq.

***

- Alo! Həkim. Qonşu blokdan söz soruşduğu yerdə qəfil asqırdı. Tez qapını örtdüm. İndi nə edim, bilmirəm?

***

- Alo, həkim, bilmirsiz, ayətül-kürsü koronavirusa kömək eləyir?

***

- Alo. Baxın sizə bir söz deyim. Mən evdə tək oluram. Heç kimi də yanıma buraxmıram. Qzıdrmam qalxsa, məni karantinə almağa ehtiyac yoxdur.

***

Sərxoş kişi səsi:

- Alo. Arvadım evdən qaçıb. Sevgilisi var, bilirəm. Amma mən onu yenə bağışlamağa hazıram. Mümkünsə tapın gətirin!

• Azərbaycanlıların “plyonkalı maşın” ehtirası - İkinci Mahmud
• Azərbaycanlı Sizif - Murad Köhnəqalanın yeni hekayəsi
• Dəyirmanda sükut üyüdən "intellektual dərviş"