Samsun şəhərində Türkiyə Mədəniyyət və Turizm Nazirliyinin Dövlət Opera və Balet Teatrının səhnəsində görkəmli Azərbaycan bəstəkarı Fikrət Əmirovun “Nəsimi” baletinin premyerası olub.

Layihə böyük Azərbaycan şairi İmadəddin Nəsiminin anadan olmasının 650 illiyi münasibətilə türk dünyasında “Nəsimi ili” elan edilməsi münasibətilə reallaşdırılan silsilə tədbirlər çərçivəsində gerçəkləşib.

Nəsimi rolunda Samsun Opera və Balet Teatrının sənətçiləri - Orçun Ünal, Cem Şenoğlu və Həsən Özvar (gənclik yaşında), şairin həyat yoldaşını Busə Cengiz, qızını İdil Şengül, Misir Sultanı obrazını Süleyman Taşçıoğlu oynayıblar. Digər obrazlarda da teatrın tanınmış aktyorları çıxış ediblər.

Tamaşaçıların böyük maraq göstərdikləri premyera yaradıcı heyəti dəfələrlə hərarətli alqışlarla qarşılayıb.

Premyeradan sonra Azərbaycanın Ankaradakı səfiri Xəzər İbrahim, Samsun valisinin müavini Sezgin Üçüncü və Azərbaycanın TÜRKSOY-dakı nümayəndəsi Elçin Qafarlı səhnə arxasında yaradıcı heyətlə görüşüb, səfirliyin və TÜRKSOY-un adından təşəkkürnamə və xatirə hədiyyələri təqdim ediblər.

Məlumat verilib ki, Türkiyə Mədəniyyət və Turizm Nazirliyi dünya poeziyasının görkəmli simalarından olan Nəsiminin yaradıcılığına böyük diqqət göstərərək “Nəsimi” baletinin Türkiyə premyerasını səhnələşdirmək üçün Azərbaycanın görkəmli sənətkarlarına Xalq artistləri - Əməkdar incəsənət xadimi, dirijor, professor Yalçın Adıgözəlova, xronoqraf Kamilla Hüseynovaya, libretto müəllifi Əjdər Ulduza müraciət edib. Azərbaycanın görkəmli sənətçiləri “Nəsimi” baletinin Türkiyə premyerasında uğurla səhnəyə çıxarılması üçün böyük səy göstəriblər.

“Nəsimi” baletinin nəfis səhnə tərtibatında tamaşaçılara təqdim edilməsi ortaq dəyərlərimizə ehtiramın növbəti göstəricisi olub. “Nəsimi” baletinin teatr mövsümü ərzində səhnələşdirilməsi nəzərdə tutulub.

Tamaşaçılardan Ömər Pamuk baletlə bağlı təəssüratlarını bölüşərək deyib: “Nəsimi təkcə Azərbaycanın yox, bütün türk dünyasının ortaq sərvətidir. Türkiyədə poeziyasevərlər böyük şairi tanıyır və şeirlərini sevə-sevə oxuyurlar. “Nəsimi” baletinin Samsunda səhnəyə qoyulması ortaq mədəniyyət tariximizdə mühüm hadisədir”. /azertag.az/

• Vaqif Poeziya Günlərinin vaxtı açıqlandı
• Bir evimiz olmadı kirayələrdən uzaq... - Əsəd Qaraqaplan
• Azərbaycanlı Sizif - Murad Köhnəqalanın yeni hekayəsi