Kulis.az gənc şairə Nuranə Nurun şeirlərini təqdim edir.
Getmək
Getmək…
Arxanca baxacaq bir cüt
sevdiyin gözün olduğunu bilə-bilə
rəsmlərinlə,
sözlərinlə,
gözlərinlə,
xatırlanacağını bilə-bilə
getmək…
Ayrı-ayrı ürəklərdə eyni kədəri bölmək,
Ayrı-ayrı kəlmələrlə eyni sözü eşitmək
və getmək…
kəpənək ömrü ilə kifayətlənmək
yaşanacaq çox şeyin olduğunu bilə-bilə
tərk etmək və getmək…
hələ doğulmayanlarla,
hələ ölməyənlərin
heç birinin həyatda olmadıqlarını
dərk etmək
və getmək…
Həyat
Yordum səni, HƏYAT
Üz çevirsən də məndən ,
düz gözlərinin içinə baxıram...
Gözlərinin dilini yaxşı bilirəm.
Rahat olsun başqasına verəcəyin könlün,
Bir öpüş də almağa qıymadım,
Başqasını sevərsən deyə...
Sonralar
Yaşanmış bir ömür,
işlənmiş bir əşyanın qutusu kimi.
Gedilmiş yol,
izləri süpürülmüş küçələr .
Adiləşir, bütün qəribələr ...
İlk dəfə məni görəndə,
roman oxuyarkən, qəflətən,
diqqətini aparan xəyal kimi ,
maraqlandırmışdım səni.
İtirmişdin özünü,
Belə deyirdin, sonralar...
Bir elan da vermişdin -
“Məni tapana mükafatım var”.
Nə? ...bilmirdim.
Bilə bilməzdim,
mən ola bilməzdim ,
tutduğu balığı
dənizə bağışlayacaq ...
Nuhun gəmisində də yer qalmamışdı bizə.
Sonralar...
heç bir romanda ,
rast gəlmədim özümüzə.
Unutduğum qədər xatırladım səni sonralar...
Gedənləri yox...
Bir boşluqdan içəri keçib,
Tanımadığım bir hissin içində azmışam.
Ya özümdən gedirəm, ya özümə gəlirəm.
Daha qaranlıqdan qorxmuramsa,
demək pislikləri görə bilirəm.
Nəfəsini geri çəkib,
bütün fikirlərimi ayaqlayıb,
ürəyimdə tutub saxlamağa çalışdığım dilək
addım-addım yoxa çıxır.
Mən gedənləri yox,
Gedişləri unuda bilmirəm.
Fon
Mənə toxunandan sonra,
ürəyimə yatan cümlələrə dönüşən
nəfəsin üçün darıxanda, düşünürəm ki,
hər tapdığın şey sənindi - demək deyil.
Mən sənin həyatının arxa fonuyam,
həyatını daha gözəl göstərmək üçün.
