Kürçaylı Məmmədov

Biz axtaran çiyinlər

Bir çiyin verin mənə,
başımı söykəyib
səhərə qədər ağlayacaq
bir şair çiyini...

Nilufər Muğantürk

Bütün bağışlamalarda
Bir qızın eşqi,
bir oğlan darıxmağı var…
Hələ gecələri demirəm,
Hələ çəkilməyən siqaretlərin tüstüsünü,
İçilməyən içkilərin dumanlığını,
Sübhədək musiqi,
xatirə sərxoşluğunu...
Sən də çiyin axtarırsan
Başını qoyub ağlamağa, dost.
Biz axtaran çiyinlər
çoxdan özgələrin yataq,
ümid yeridir.
Çoxdan çalınıb havası,
Başqa taleləri kiridir
biz axtaran çiyinlər...

Heç kim də
başını qoymaq istəmədi bizim çiyinlərə,
Öz çiynimizdə qaldı
başımız,
kədərimiz,
göz yaşımız...
Bir də bomboş umid yeri var,
ağrıdır hələ də,
ağırdır çiynimizdəki bu boşluq...

26.01.2013

***

Bütün vidalar insanlar üçündür,

Bütün ayrılıqlar insanlar üçün.

Vüsalı sevmədi insanlar,

Bütün vüsalların sonunda yol ayrıcı var deyə

sonu yoxdu ayrılıqların...

Vüsaldakı insanları sevmədilər....

Ayrılıqlardakılar,

vidalardakılar yadda qaldı ancaq,

Xatirələrdəkilər yadda qaldı...

Yadda qalıb

ağrıtdı içimizi zaman-zaman.

Sevdik ağrılarımızı,

Ayrılıqlarımızı sevdik,

Vidalarımızı sevdik,

Bir də tənhalığımızı,

Bir də bizi tərk edib gedəni...

Göz yaşı doldurub qədəhə

qaldırdıq hər gecə intihar şərəfinə...

25.01.2013

• "Çakallarla Dans 7" filmi gəlir
• VIII DokuBaku Beynəlxalq Filmlər Festivalının açılışı baş tutdu
• İnsanlar niyə vegetarian olmaq istəyir? - Qlamurların qocalmaq qorxusu