Aprelin 11-də Azərbaycan Dövlət Gənc Tamaşaçılar Teatrının bir qrup yaradıcı heyəti Şamaxı rayonuna səfər edərək, Azərbaycan Müəllimlər İnstitutunun Şamaxı filialının kollektivi ilə görüşəcək. Teatrın mətbuat xidmətinin “Kulis"ə verdiyi məlumata görə yaradıcı heyət yazıçı-dramaturq Əli Əmirlinin “Hasarın o üzü” əsəri əsasında hazırlanmış eyniadlı tamaşa ilə rayon ictimaiyyəti qarşısında çıxış edəcək.

“Hasarın o üzü” teatrın cari repertuarda olan maraqlı, günün aktual problemlərini əks etdirən tamaşalardandır. Tamaşanın quruluşçu rejissoru əməkdar incəsənət xadimi Bəhram Osmanov, quruluşçu rəssamı əməkdar rəssam İsmayıl Məmmədov, bəstəkarı xalq artisti Səyavuş Kərimidir.

“Hasarın o üzü” tamaşasında əsas obrazları xalq artistləri Həmidə Ömərova (Humay), Nurəddin Mehdixanlı (Qərib), teatrın gənc aktrisaları Günel Məmmədova və Səbinə Məmmədova ifa edəcək.

Tamaşa bir ailə daxilində dinə ikili münasibətdən bəhs edən kəskin konfliktli, maraqlı süjetli səhnə versiyası olaraq düşünülüb. Dinə baxış, insan mənəviyyatı, əxlaq prinsipləri, milli mentalitet və cəmiyyətin bu dəyərlərə münasibəti bir ailə çərçivəsində bütün kəskinliyi ilə bədii obrazlar vasitəsilə önə çəkilir.

• Filmlərə dəstək məqsədilə növbəti müsabiqə elan edildi
• "Müəllif, təəssüf ki, tələsib..." - Hekayə müzakirəsi
• “Hərbi jurnalist Rəşad Süleymanov” Media Mükafatı təqdim edildi