Cəfər Cabbarlı adına “Azərbaycanfilm” Kinostudiyasında dövlət sifarişi ilə istehsal olunan “Əsgərin şücaəti” adlı yeni tammetrajlı bədii filmin çəkilişlərinə başlanılıb.
Film İkinci Dünya müharibəsində faşizm üzərində qələbənin 70 illiyinə həsr olunub. Çəkilişlər Belarusun Brest şəhərində aparılır.
Filmdə Almaniya və Rusiyanın tanınmış aktyorları çəkilir. Baş qəhrəmanı isə, Azərbaycan Dövlət Pantomima Teatrının aktyoru Bəhruz Vaqifoğlu oynayır.
Kulis.az-a açıqlamasında aktyor çəkilişlərdən məmnun olduğunu deyib:
“Ürəklə deyə bilərik ki, kino çəkirik. Kütləvi səhnələr həm çox, həm də çətindir. Amma Elxan Cəfərov layiqincə öhdəsindən gəlir. O, döyüş səhnələrini beş-altı cür, özü də neçə dubla çəkir. İstədiyini almayınca “stop” demir. Bu, əladır. 3 kamera və üstəgəl vertolyot. Çəkilişlər hələ ki “Beloe ozero” deyilən yerdə gedir, yəqin ki, bir-iki günə çəkilişləri burada bitirib Brest qalasına yollanacağıq”
Bəhruzun sözlərinə görə, filmdəki hadisələr İkinci Dünya müharibəsi zamanında və Qarabağ müharibəsi dövründə baş verir: “Filmin adı “Əsgərin şücaəti” adlanır. Mənim obrazım da burda həmən əsgərdi. Adı Azərdi. Azər böyük Vətən Muharibəsində cavan oğlandır. Qarabağ müharibəsində qoca veterandı. Mən Azərin gəncliyini oynayıram.”
Qeyd edək ki, filmin ssenari müəllifləri Yuri Vorobyov və Yavər Rzayev, rejissoru Elxan Cəfərov, quruluşçu operatoru isə Nadir Mehdiyevdir.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
