Rejissorlar Elməddin Alıyev və Xəyyam Abdullazadənin “Nargin” adlı filmi Azərbaycan Respublikası Mədəniyyət Nazirliyi və Azərbaycan Respublikasının Kino Agentliyinin təşkil etdiyi müsabiqədə qalib gələrək 350 min manat dəyərində maliyyə əldə etmək hüququ qazanıb.

Kulis.az xəbər verir ki, filmin ssenarisinə görə hadisələr fotostudiyada başlayır.

Fotoqraf Sona xanım Hacıyevanın fotosunu çəkməyə hazırlaşır və bu vaxt küçədə səs-küy düşür. Sona xanım fotonun çəkilməsini gözləmədən küçəyə çıxır. Bu zaman fotoqraf aparatı işə salır və tüstü ətrafı bürüyür. Kompozisiyada isə boş kətil görünür. Sona xanım həyəcanla limana doğru aparılan türk əsirləri izləyir.

Bu real hadisələr “Nargin” adlı bədii-sənədli filmin süjet xəttini təşkil edir.

Birinci Dünya Savaşı zamanı Sarıqamışda ruslara əsir düşən 10 min türk Xəzərdəki “Nargin” adasına yerləşdirilir. Onların bu adadakı faciəvi həyatı azərbaycanlıları narahat edir. Türk əsirlərin Nargin adasından sistemli şəkildə qaçıranlardan biri də Sona xanım Hacıyevadır. Sona xanım Bakıda yaşayan neft milyonçusu İsrafil Hacıyevin həyat yoldaşı, həmçinin “Bakı Müsəlman Xeyriyyə Cəmiyyəti”nin qadın fraksiyasının rəhbəri olub. O, fədakarlıq göstərərək şəxsi hesabına əsirlərə tibbi, ərzaq yardımı göstərib və yüzlərlə əsirin, əsasən də yüksək rütbəli zabitlərin xilas olunmasına nail olub. Ən əsası isə onların adadan qaçırılması əməliyyatlarında şəxsən iştirak edib. Türk əsirləri Nargin düşərgəsindən xilas etdiyi üçün istintaqa cəlb olunub. İstintaq zamanı rus və erməni müstəntiqlər Sona xanımın şəxsi arxivini məhv ediblər.

55 dəqiqəlik tarixi dram “Karvan production” tərəfindən istehsal olunur. Filmin ssenarisi Xəyyam Abdullazadəyə məxsusdur. Operator Aleksey Malinkoviç, rəssam Vüsal Rəhim, qrim rəssamı Adilə Alıyeva, rejissor qrupunun üzvləri Müşfiq Mirzə, Laçın İsmayılzadə, prodüser Elməddin Alıyevdir. Əsas rollarda Günel İmanova, Sənan Əlləz, Aygün Fətullayeva və digər aktyorlar iştirak edirlər.

Filmin çəkilişləri Bakıda, Nargin adasında və ümumiyyətlə Abşeron yarımadasında həyata keçirilir. İlin sonuna qədər hazır olması planlaşdırılan “Nargin” filmi 2025-ci ildə geniş tamaşaçı auditoriyasına təqdim olunacaq.

• Bəstəkarlar İttifaqının 90 illik yubileyi qeyd olunub
• Məşhur qrupun musiqiçisi dünyasını dəyişdi
• Ulucay Akifin şeir gecəsi olacaq