Məşhur döyüş filmi olan "Məğlubedilməz"də (Die Hard) terrorçu Uli rolu ilə tanınan Hollivud aktyoru və kaskadyoru Al Leonq insult keçirdikdən sonra təcili olaraq Kaliforniyada xəstəxanaya yerləşdirilib.
Kulis.az xəbər verir ki, bu barədə "TMZ" nəşri məlumat yayıb.
Aktyorun ailəsinə yaxın mənbələrin məlumatına görə, hadisə ötən həftə baş verib. Hazırda sənətçinin vəziyyəti barədə məlumat verilmir. Leonqun ailəsi ictimaiyyətdən onların şəxsi həyat toxunulmazlığı hüququna hörmətlə yanaşmağı və detalları yaymamağı xahiş edib.
Al Leonq kino karyerasına 1981-ci ildə kiçik bir rolla başlayıb. Aktyorun ən yaddaqalan işləri arasında "Kiçik Çində böyük qarmaqarışıqlıq" (1986) filmində "Vinq Konq" döyüşçüsü və "Ölümcül silah" (1987) filmindəki muzdlu qatil Endo obrazları var.
Ona ən böyük şöhrəti isə "Məğlubedilməz" (1988) filmindəki Uli rolu qazandırıb. Onun canlandırdığı personaj Los-Ancelesdəki "Nakatomi Plaza" göydələnini ələ keçirən terrorçu qruplaşmasının üzvü idi və Brüs Uillisin qəhrəmanı – polis Con Makkleynlə silahlı toqquşmada həlak olurdu.
Leonqun filmoqrafiyasında "Bill və Tedin inanılmaz sərgüzəştləri" (1989) komediyasında Çingiz xan rolu, həmçinin "Ti Cey Huker" və "Yolların cəngavəri" kimi məşhur teleseriallarda iştirakı da var. Döyüş sənətlərinin inkişafındakı xidmətlərinə görə 2014-cü ildə Al Leonq Döyüş Sənətləri Tarixi Muzeyinin "Şöhrət Zalı"na daxil edilib.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər