"Ulduz müharibələri"nin (Star Wars) əfsanəvi rejissoru Corc Lukas sentyabrın 22-də Los-Ancelesdə özünün Narrativ İncəsənət Muzeyini (Museum of Narrative Art) açacaq.
Kulis.az xəbər verir ki, bu barədə CNN telekanalı məlumat yayıb.
Telekanalın məlumatına görə, belə bir müəssisə yaratmaq ideyası kino saqasının yaradıcısı və onun həyat yoldaşı Mellodi Hobsonda hələ 16 il əvvəl yaranıb. Əvvəllər San-Fransisko və Çikaqoda bu cür muzeyin inşası ilə bağlı layihələr uğursuzluğa düçar olaraq ləğv edilmişdi. Bütün bunlara baxmayaraq, Lukas bu işdən əl çəkməyərək layihəyə təxminən 1 milyard dollar şəxsi vəsaitini xərcləyib.
Materialda qeyd olunur ki, muzeyin daxilində Lukasın 50 il ərzində topladığı sənət əsərləri, kostyumlar, kino rekvizitləri və xatirə əşyalarından ibarət zəngin kolleksiyası nümayiş olunacaq. Eksponatlar arasında komiks illüstrasiyaları, "Ulduz müharibələri"nin konseptual rəsmləri, impressionizm şedevrləri və Sikstin kapellasının (Sistine Chapel) reproduksiyalarını tapmaq mümkündür. Muzeyin 30 zalında ümumilikdə 1300-dən çox əşya sərgilənir.
Mətbuat üçün keçirilən qapalı tədbirdə rejissor muzeyin yaradılması zamanı çox uzun və çətin bir yol qət edildiyini bildirib. Bürokratik əngəllər və layihəni dəstəkləməyən insanlarla qarşılaşmaq az qala onun iradəsini qıracaqdı, lakin Lukasa xas olan "axına qarşı getmək" xarakteri sayəsində bu nəhəng muzeyi ərsəyə gətirmək mümkün olub.
Xatırladaq ki, layihənin açılışı bundan əvvəl bir neçə dəfə təxirə salınmışdı.
CNN-in məlumatına görə, qıvrımlı formaya malik qeyri-adi, ağ rəngli binanın dizaynı "MAD Architects" memarlıq bürosu və "Stantec" şirkəti tərəfindən hazırlanıb. Təxminən 27,9 min kvadratmetr sahəsi olan bu muzey kənardan baxanda nəhəng bir kosmik gəmini xatırladır. Bina şəhərin cənub hissəsindəki "Exposition Park"ın üzərində sanki havada süzülür.
Corc Lukas kimdir?
Corc Lukas (George Walton Lucas Jr.; 14 may 1944-cü ildə anadan olub) — amerikalı kinorejissor, ssenarist, prodüser və sahibkardır. O, dünya kinosu tarixində ən uğurlu və populyar franşizalardan olan "Ulduz müharibələri" (Star Wars) və "İndiana Cons" (Indiana Jones) seriyalarının yaradıcısı kimi qlobal şöhrət qazanıb. "Lucasfilm", "Industrial Light & Magic" (ILM) və "Pixar" (ilkin versiyası) kimi nəhəng kino, eləcə də vizual effekt şirkətlərinin qurucusu olan Lukas müasir blokbaster kinosunun formalaşmasında əvəzsiz rol oynayıb. O, tarixin ən zəngin kinematoqrafçılarından biri olmaqla yanaşı, təhsil və incəsənət sahəsinə milyonlarla dollar ianə edən böyük xeyriyyəçidir.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
