CBC Azərbaycan beynəlxalq teleşirkətinin “Azərbaycan ərazisində Türk damğaları” sənədli filmi Berlində keçirilən Almaniyanın ORION Beynəlxalq Film Festivalının finalçısı olub.

Kulis.az xəbər verir ki, sənədli film Azərbaycanın nadir mədəni irsinə-türk damğalarına, türk xalqlarının tarixində mühüm rol oynayan qədim tayfa kimlik əlamətlərinə həsr olunub. Ölkə boyu səpələnmiş bu rəmzlər əcdadlarımızın irsinin canlı sübutudur. Onlara karvansaralar, məqbərələr kimi tarixi tikililərdə, həmçinin qəbir daşlarında rast gəlinir.

Film CBC telekanalı tərəfindən ölkənin mədəni-tarixi sərvətlərinin tədqiqi və təbliği layihəsi olan “Naməlum Azərbaycan” silsiləsi çərçivəsində hazırlanaraq ərsəyə gəlib. Bu layihənin filmləri keçmişin, tarixin, mədəniyyətin və təbiətin az öyrənilmiş səhifələrini açır, tamaşaçılara Azərbaycan irsinə bənzərsiz baxışları təqdim edir.

“Naməlum Azərbaycan” layihəsinin müəllifi tarixçi və tədqiqatçı Vahid Şükürovdur.

Qeyd edək ki, ORION Beynəlxalq Film Festivalı hər il müstəqil kinorejissorları bir araya gətirir, onlara yaradıcı ifadə və mədəni dialoq üçün platforma təqdim edir. Festival geniş janrları əhatə edir və yeni istedadları kəşf etmək, onların məharətini, yaradıcılığını və bədii müxtəlifliyini qiymətləndirmək məqsədi daşıyır.

• Folklor və postmodern təhkiyə - Elnarə Qaragözova
• Kinotənqidçilər və Kinoşünaslar Gildiyasının mükafatına namizədlər
• Murad Arif: "Başın tutursan, dalı gedir"