ABŞ-də Hollivud Xarici Mətbuat Assosiasiyasının (Hollywood Foreign Press Association – Hollivudda akkreditə olunmuş əcnəbi jurnalistlərin birliyi) təsis etdiyi “Qızıl qlobus” mükafatının (Golden Globe Award) növbəti, 82-ci təqdimatı olub.

Kulis.az xəbər verir ki, audiovizual sənət üzrə 2025-ci ilin ilk mükafatının sahibləri yanvarın 6-na keçən gecə Beverli-Hills şəhərində (Kaliforniya ştatı) təşkil olunan mərasimdə elan edilib.

Dram janrında ən yaxşı ekran əsəri kimi amerikalı rejissor Breydi Korbetin (Brady Corbet) “Brutalist” filmi “Qızıl qlobus”a layiq görülüb. Bu filmdə çəkilən Adrien Brodi isə ən yaxşı dramatik aktyor seçilib.

Xarici dildə (ingilis dilində olmayan) ən yaxşı film kimi mükafata fransız rejissor Jak Odiarın “Emiliya Peres” filmi layiq görülüb. Bu ekran işi, həmçinin ən yaxşı müzikl janrında “Qızıl qlobus” qazanıb. Amerikalı aktrisa Zoi Saldana bu filmdəki ən yaxşı ikinci plan qadın roluna görə mükafat alıb.

Ən yaxşı ssenari mükafatını alman rejissor Edvard Bergerin “Konklav” filminin mətnini yazan Piter Stroqan alıb.

Ən yaxşı ikinci plan kişi roluna görə “Real ağrı” filmində çəkilən Kiran Kalkin təltif olunub. Dram serialında ən yaxşı kişi və qadın rollarına görə mükafatları “Sequn” filmində oynayan Hiroyuki Sanada və Anna Savai qazanıblar.

Ən yaxşı mini serial “Maral balası” olub. Kolin Farrell (“Pinqvin”) və Codi Foster (“Əsl dedektiv: Gecə ölkəsi”) mini serial üzrə ən yaxşı aktyor və aktrisa mükafatlarını alıblar. “Hiylələr” ən yaxşı komediya serialı kimi, Ceremi Allen Uayt (“Ayı”) və Cin Smart (“Hiylələr”) komediya serialında ən yaxşı aktyor və aktrisa kimi “Qızıl qlobus”a sahib çıxıblar.

62 yaşlı amerikalı aktrisa Demi Mur isə “Substansiya” filmindəki baş roluna görə (“Musiqili komediyada ən yaxşı aktrisa” kateqoriyası) ilk “Qızıl qlobus” mükafatını qazanıb.

Ümumilikdə 27 film və televiziya nominasiyası üzrə “Qızıl qlobus”un qalibləri elan edilib. “Emiliya Peres” filmi ən çox – 10 nominasiya üzrə qalib olub.

1944-cü ildən təqdimatı keçirilən “Qızıl qlobus” ABŞ-də nüfuzuna görə “Oskar”dan sonra ikinci ən əhəmiyyətli film mükafatıdır.

• Türkiyəli aktrisa İstanbul aeroportunda saxlanıldı
• Yüzlərlə sənətçi incəsənət yarmarkasında iştirak edəcək
• Tanınmış aktrisanın səhhəti pisləşdi