Kulis.az Əlisəmid Kürün yeni şeirini təqdim edir.

ÜRƏYİMƏ DAMIB, KÖNÜL ARİF,

SƏN ŞEİR OXUYACAQSAN CIDIR DÜZÜNDƏ!

Ola bilər, biz görmədik Şuşanı...

Ola bilər,

Aqil Abbas yetmədi Ağdama –

Dizinə, başına döyə-döyə

Qocaldı Milli Məclisdə...

Ola bilər...

Ola bilər,

Zakir Fəxri yuxusunda görür Şuşanı, ola bilər,

Ola bilər,

Vaqif Bayatlı küsüb getmədi Cocuq Mərcanlıya,

Ramiz Rövşən – Miskanlıya...

Ola bilər...

Ola bilər,

Şərif Ağayar görmədi Laçını,

Mələyə-mələyə qaldı Hərami düzündə...

Ola bilər...

“Mən Şuşadanam” deyirsən,

Olsun...

Mən o gün bilmişəm, sən Şuşadansan,

Sən şüşə kimisən, sözü oxşayan qızım,

Şuşaya oxşayan qızım!..

Biz aldanmışıq,

Bizi aldadıblar,

Könlünə dəyməsin xarı bülbülün

Ondan bir tanə deyil,

Ondan min cürəsi var Balu adasında...

Bizi aldadıblar,

Biz aldanmışıq.

Ola bilər, biz görmədik Şuşanı...

Ola bilər,

Aqil Abbas yetmədi Ağdama –

Dizinə, başına döyə-döyə

Qocaldı Milli Məclisdə...

Ola bilər...

Ola bilər,

Zakir Fəxri yuxusunda görür Şuşanı, ola bilər,

Ola bilər,

Vaqif Bayatlı küsüb getmədi Cocuq Mərcanlıya,

Ramiz Rövşən – Miskanlıya...

Ola bilər...

Ola bilər,

Şərif Ağayar görmədi Laçını,

Mələyə-mələyə qaldı Hərami düzündə...

Ola bilər...

Biz qocaldıq, “Şuşa” deyə-deyə

Şüşəyə, Şuşaya oxşayan Könül Arif!

Ürəyimə damıb, sən şeir deyəcəksən Cıdır Düzündə

Boynunu bükməzsən bənövşə kimi

Sən şeir deyəndə Cıdır Düzündə.

Minarələr dağılıb,

Şuşa öz yerindədir,

Sözü oxşayan balam,

Ürəyimə damıb, sən şeir oxuyacaqsan Cıdır Düzündə

Baban Həsənqulu kişinin dağılmış darvazasına baxa-baxa...

• Mən sözü qoymuşam gözümün üstə... - “Səksənincilər" layihəsindən Səməd Qaraçöpün şeirləri
• Filarmoniyada 20 Yanvar faciəsi qurbanlarının xatirəsi anılacaq
• Cavan ölsəm, ellər məni ağlasa... - Ülvi Bünyadzadənin şeirləri