Kulis.az tanınmış şair Şəhriyar del Geraninin yeni şeirini təqdim edir.
Bir qadın olmalıdır əlbət;
quşlara uçmağı,
balıqlara üzməyi,
buludlara yağmağı öyrədən bir qadın.
Olmalıdı əlbət
səadətə çatmaq üçün adamlara 100-ə qədər saymağı öyrədən bir qadın.
Çox üşüdüm keçən qışlarda,
quşlar da üşüdü,
yağışlar da,
amma mən daha çox üşüdüm,
daha uzun qışım oldu bəlkə də.
Ya bəlkə də mən daha yaxşı bilirdim qışın nə olduğunu,
ol səbəbdən çox üşürdüm.
Amma bir qadın olmalıydı əlbət mənimlə eyni qışı üşüyəcək...
Çoxdan unutmuşdum velosiped sürməyi,
uşaqlığımda qalmışdı bu həvəs,
pişikləri havlayıb qorxudardıq,
ya bəlkə də köpəklərə öyrədərdik hürməyi.
Bilmirəm.
Bəlkə köpəklər də adamlardan öyrənmiş bu tövr gəvəzəlikləri.
Nə fərq edər ki?
Mənə velosiped sürməyi xatırladacaq bir qadın olmalıydı...
Böyləcə keçməli deyil ki ömür,
Deyil əlbət.
Bir qadın olmalı - üzündə əlin, ağzında dilin kimi bir qadın.
Mən - dilin... - deyirəm,
Siz - ömür... - oxuyun,
Yəni Allah qarşısında ilk nəfəsdə böylə cavab verməli bir erkək:
"Mən O Qadını gözəl yaşadım..."
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər