Kulis.az Fərid Hüseynin yeni şeirlərini təqdim edir.
“Səfər şeirləri” silsiləsi – Sankt-Peterburq
XİLASKAR QAN KİLƏSƏSİNDƏ
Bəlkə də hər təzə heykəllə
üst-üstə vurulan taxtayla
bir də çəkilir çarmıxa İsa.
Və kilsədə bu qədər insan ömrü
səcdədə keçir - əzəli günahlarına.
Bəlkə də yandırılan hər şamla
hər kəs öz günahlarına işıq salır.
Bəlkə də
hər kilsə zəngiylə vaxt daralır.
Çarmıx, çarpaz taxtalar deyil,
İsanın hicrət elədiyi yerin adıdı -
çünki
qanla suvarılmış yer qalmamışdı ölməyə.
Çarmıx, İsanın ən güvəndiyi adamdı –
bir kimsəsi yox idi kürək söykəməyə…
FİKİR YORĞUNUNUN DEDİKLƏRİ
Kilsələrin üstündəki xaçlar
bənzəyir dinə sancılmış qılınca.
Qürbətdə yada düşən dərdlərim,
könlümü incidir, bağrımı sökür -
Bakı vaxtıyla - öz saatımızla...
Bu döyüş meydanı dünyada
“İbadət edən silahlar”ın səsindən,
tutulub, kardır qulaqlarımız.
Burda kilsə zəngiylə döyülür yerə,
əcələ tələsən "əsgər ayaqları"mız...
İnsafdırmı, görəsən,
faniliyinin haqqını əbədiyyətlə ödəyirik –
cənnətlə, cəhənnəmlə.
əbədi zülmlə, əbədi xoşbəxtliklə -
Ayaq üstə yaşamaqdır sonucu qələbəmiz -
bizi torpağa çəkən dünyada - çəliklə.
ALEKSANDR NEVSKİ KÖRPÜSÜNDƏ
Artıq qum dənəsindən də çoxdur
anbaan çəkilən şəkillər.
Yaşatmaq istədiyimiz anlar
öz əlimizdəcə ölürlər.
Bu dünyada bir ömrü boyu
gözəl yaşamaq çətindir deyə
çəkdirdiyimiz şəkillərdə
bircə an gözəl olmağa çalışırıq.
Hər şəkildə gülümsəyə-gülümsəyə
ölümlə barışırıq.
Bir azdan açılacaq körpü,
əvvəl yük,
sonra sərnişin
gəmiləri görünəcək.
Sanki öndə qalaqlanmış günahlar,
arxada günahkarlar yürüyəcək.
Yaşadıqca insan ömür sarvanından,
günah karvanının dəvəsinə çevrilir.
Və bu səfərdə bircə yollar bilir ki,
hər bixitiyar mənzil başına tələsir.
BƏYAZ GECƏLƏR
Hardasan, Ey Günəş,
gözüm yollarda qaldı.
Bu gecə öz sükutunu
uşaq qığıltısına
dəyişməyə hazırdı…
Son sözünü deyir sükut
bu açılan səhərə
bir azdan oyanacaq
ana narahatlığı
uşaq səsinə…
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
